Allah rəhmət eləsin
- 8-10-2024, 14:20
- Maraqlı
- 0
- 341
Asif Cahangir oğlu Abbasov
Rayonun pedaqoji ictimaiyyətinə itki üz vermişdir. Gözəl insan, qabaqcıl, təcrübəli pedaqoq Asif Cahangir oğlu Abbasov ömrünün 67-ci ilində dünyasını dəyişmişdir.
Asif Abbasov 17 sentyabr 1957-ci ildə Masallı rayonu, Bədəlan ərazisinin Dəmirçi kəndində, zəhmətkeş ailəsində anadan olmuşdur.
A.Abbasov orta təhsilini Dəmirçi və Bədəlan kənd məktəblərində alıb. Lənkəran Pedaqoji Texnikumunu və Azərbaycan Dövlət Pedaqoji İnstitutunun ibtidai təlim pedaqogikası və metodikası fakültəsini bitirmişdir. 1981-ci ildə Dəmirçi kənd ümumi orta məktəbində pedaqoji fəaliyyətə başlamış, 41 il bu təhsil ocağında çalışmışdır. İşlədiyi müddətdə qabaqcıl müəllim kimi tanınmışdır. O, ibtidai siniflərdə tədris olunan fənlərin məzmun və ideyasının dərindən mənimsəmək, təlimin ən səmərəli metodikasından istifadə edərək şagirdlərin hərtərəfli inkişafı sahəsində sistemli iş aparmışdır. 1996-1997-ci tədris ilində rayon üzrə “İlin ən yaxşı müəllimi” müsabiqəsinin qalibi olmuşdur. Ali kateqoriyalı müəllim idi. Təhsil nazirliyinin, rayon təhsil şöbəsinin və digər təşkilatların fəxri fərman və diplomuna layiq görülmüşdür.
Onun jurnalistika sahəsindəki fəaliyyəti də uğurlu olmuşdur. “Xalq”, “Yeni həyat” (“Çağırış”), “Təhsil”, “Azərbaycan müəllimi”, “Fidan”, “Söz”, “Aşkarlıq” və digər qəzetlərdə yüzlərlə elmi, publisist məqalələri diqqət çəkmişdir.
Təcrübəli insan kimi bölgədə tanınan Asif Abbasov onu tanıyanların qəlbində daim yaşayacaq.
"Yeni həyat" qəzeti,
www.yeniheyet.az
