Ciddi siqnal

Pomidor, xiyar niyə qıtdır?

Hərdən əllərimi arxada cütləyib bazara çıxmağım var. Baxım görüm bazarda ucuz-baha nə var, nə yox. Onsuz da köhnə bazarın yolu elə Viləş körpüsündən aşağı enəndən başlayır. Yolun solunda apteklər, cürbəcürə marketlər, sağında tərəvəz məhsuları, ən çox isə soğan-kartof, quş dənləri.

Müşahidələrimdə görürəm ki, hamı xiyar, pomidor, bibərlə maraqlanır. 10-12 yaşlı bir oğlan uşağı malların üstündə nəzarətçi kimidir.

-Oğul, bala, pomidor neçəyədir, hara məhsuludur?
Uşaq qrammafon valı kimi ötməyə başlayır.

-Əmi, alansan ya vaxtımı alıb qiymət soruşursan? Sonra əli ilə malları bir-bir göstərir:
-Bax, bu Salyan pomidorudur, bir az yumşaq olsa da, ləzzətli məhsuldur.  Bunlar isə Sabirabaddan gəlib. Görürsən, daş kimidir. Bu isə Zirə pomidorudur, 1  manat 40 qəpiyə satırıq.  Qiyamət məhsuldur.  Ölkənin hər yerində əl-əl gəzirlər. Xiyar da əsasən, Salyan, Saatlı, Sabirabaddan gəlib. Hər yerdə 1,2 -  1.4 manatdır.
-Oğlum,  bəs yerli məhsullarınız yoxdur?
-Nə bilim a kişi, 3-4 ildir atama kömək edirəm, hələ eşitməmişəm ki, bazarda Masallı pomidoru, xiyarı olsun.
Malların əsl sahibi  söhbətimizə müdaxilə edir:

-Ay müəllim, uşaq hardan bilsin. Yəqin rayonda xiyar-pomidor yetişdirmirlər ki, bazara da gəlib çıxmır. Biz də istəyərdik ki, yerli məhsul sataq, həm ucuz olsun, həm də keyfiyyətli. Neçə illərdir bazarda yerli kələm, bibər də yoxa çıxıb.
Deyirəm, ey gidi dünya, bax gör, bir vaxtlar nəhəng Sovetlər birliyinin nəhəng şəhərlərini kələm, pomidor, badımcan və sitrus məhsulları ilə təmin edən Masallı bu gün özünü bu məhsullara olan tələbatı qarşısında aciz qalır.

Rayon statistika idarəsindən aldığımız məlumatda göstərilir ki, bu il rayonda 537,5 hektar pomidor,   336,5    hektar xiyar,    94,5    hektar bibər  əkilib. Bu rəqəmləri biləndə “ətdirsə pişik hanı, pişikdirsə ət hanı?” məhşur deyim yada düşür.

Bir dəfə kələm əkini ilə əlaqədar DAİM-in mütəxəssisi ilə söhbətimizdə suyun olmaması bəhanə gətirilirdi. Deyim ki, su da bəhanədir. Bu qədər Viləşçay dəryaçasının suyundan istifadə edib rayonda 50-60 hektar kələm əkmək olmaz?  Bu həmin Dəryaçadır ki, bir vaxtlar onun suyu ilə 3000 hektardan çox çay tarlası, nə qədər tərəvəz sahəsi suvarılardı.Yoxsa burda da bir kimyəvi iskir işlər var.

Qoy olsun, yəqin ki bəzi-bəzi idarə başbilənləri bu barədə baş sındıracaqlar. Eybi, yox, nə edirlər etsinlər, təki bu işlərdən bir amma çıxmasın. Hər şey rayon üçün yaxşı olsun. Biz də eşidib bundan feyziyab olaq və fikirlərimizdən qara-qura söhbətləri kənar edək.




 
Həsənağaшаблоны для dle 11.2