Rayon rəhbəri Türkoba ərazisində səyyar-görüş qəbulunu keçirdi
07 dekabr 2022-ci il tarixdə Masallı Rayon İcra Hakimiyyətinin başçısı cənab Araz Əhmədov Türkoba ərazisinin Şatıroba kəndində vətəndaşların növbəti səyyar görüş-qəbulunu keçirmişdir.
Səyyar görüş-qəbulda rayonun idarə, müəssisə və təşkilatlar rəhbərləri, şəhid ailələri, qazilər, din xadimləri, ağsaqqallar, ziyalılar və kənd sakinləri iştirak etmişdir.
İlk öncə ölkəmizin ərazi bütövlüyü uğrunda canından keçən şəhidlərin xatirəsi bir dəqiqəlik sükutla yad edilmişdir.
Sonra Masallı Rayon İcra Hakimiyyətinin başçısı Araz Əhmədov qəbula gələnləri salamlamış və səyyar görüş-qəbulunu açıq elan etdikdən sonra Masallı RİHB aparatının Ərazi idarəetmə və yerli özünüidarəetmə orqanları ilə iş şöbəsinin müdir əvəzi Vəli Muxtarov 2 avqust 2022-ci il tarixdə Türkoba kəndi ərazi sakinləri ilə görüş zamanı onların etdikləri müraciətlərin həlli ilə bağlı məlumat vermişdir.
Səyyar-görüş qəbulda çıxış edən vətəndaşlardan Fəttayev Qəzənfər Kişi oğlu, Hüseynov Rövşən Mütəllim oğlu, Nuriyeva Sevda Bahadır qızı, Əliyev Ağalar Əşrəf oğlu, Əliyeva Telnaz Fərəc qızı, İbrahimov Əfqan Cəlil oğlu və başqaları Türkoba kəndi ərazisində elektrik təsərrüfatının SİP kabelləşməsi, Şatıroba kəndinin içməli su ilə təminatı, Qəzvinoba kəndində rabitə təsərrüfatının yenilənməsi, Qəzvinoba kənd ümumi orta məktəbin tikintisinin sürətləndirilməsi, ünvanlı sosial yardım ala bilməməsi, 300 metrlik kənd yolunun təmiri, aramsız yağan yağışlar nəticəsində yaşadığı evin həyətini su basması, internet verilməsində çətinlik və rabitə xəttinin pis olması və digər sosial məsələlər barədə müraciətlər etmiş, minnətdarlıq bildirmişlər.
Masallı Rayon İcra Hakimiyyətinin başçısı Araz Əhmədov görüşü yekunlaşdıraraq, qaldırılan məsələlərin həlli istiqamətində müvafiq qurumlara tapşırıqlar vermişdir. Məsələlərdən bir neçəsi dərhal yerində həll olunmuş, digər məsələlər barəsində müraciət edən vətəndaşlara qanunamüvafiq izahat verilib nəzarətə götürülmüşdür.
“Yeni həyat” qəzeti
www.yeniheyet.az
