İlk sifarişini İngiltərədən alan qadın sahibkar: Bu işə 60 manatlıq büdcə ilə başlamışdım
1-02-2024, 15:59. Разместил: admin44
Xalqımızın qədim zamanlardan bəri məşğul olduğu sənət və peşə növlərindən biri də toxuculuqdur. Zəngin naxışlı, rəngarəng çeşidli əl işləri daim ustaların yaradıcı təxəyyülünü özündə əks etdirib, xalqın bədii estetik tərbiyəsinin inkişafında mühüm rol oynayıb. Müasir dövrümüzdə də bu sənət növü ilə məşğul olan bir çox həvəskar və peşəkar toxucu var.
Gənc sahibkar Polşada ali təhsil alıb. Sonra doğulduğu Masallı rayonuna qayıdıb ki, burada yaşasın, iş qursun. Lakin bir sıra çətinliklərlə qarşılaşıb. Buna baxmayaraq, o, təslim olmayıb, arzuları uğrunda mübarizə apararaq, Masallı qadınlarını işlə təmin edəcək sosial sahibkarlıq layihəsi yarada bilib. Beləliklə, Kifayət Talıbzadə 2019-cu ildə kənd yerlərində işsiz qadınları işlə təmin etmək üçün "AzərCorab" sosial sahibkarlıq layihəsini təsis edib və dörd qadınla corab toxumaq işinə başlayıb.
“Həmişə rayon qadınlarına fikir verirdim. Onların əsasən, ev işləri, evdən çölə çıxa bilməmələri məni narahat edirdi. Həmin xanımlarla söhbət edəndə onların iqtisadi və sosial cəhətdən sıxıldığını anlayırdım. Düşünürdüm ki, belə xanımları cəlb edə bilmək üçün bir iş qurmalıyam. Əvvəlcə araşdırma apardım, Masallıda toxucular tapdım, sap aldım və birlikdə corab toxumağa başladıq. Beləliklə bu işi qurandan sonra evdar xanımlara kiçik də olsa köməyim dəydi. Bu işə 60 manatlıq büdcə ilə başlamışdım. İcmanın xanımları əvvəllər demək olar ki, bütün vaxtlarını evlərində keçirirdilər. İndi isə çölə çıxırlar, işləyirlər, sosiallaşırlar, bir-birinə kömək edirlər. Həm də tədris prosesində iştirak edir, ailələri üçün gəlir qazanırlar. Hazırda kollektivdə iyirmidən çox toxucu var və onların sayı hər ay artır” , - deyə Kifayət Talıbzadə bildirir.
Kifayət və komandasının hazırladığı məhsullara tələbat da yüksək səviyyədədir. Çünki toxuma üsulu ilə hazırlanan əl işlərinin tərkibində heç bir kimyəvi qatqı yoxdur və təbii yundan hazırlanır. Qadın sahibkar deyir ki, gələcəkdə məhsullarını yerli və beynəlxalq sərgilərdə nümayiş etdirmək barədə düşünür və artıq bu istiqamətdə təkliflər də var. Hazırda müxtəlif formada corablar toxuyan xanımlar sifarişlər olduğu üçün kilim də toxumağa başlayıblar.
“AzərCorab” ABŞ-dən Yeni Zelandiyaya qədər hər yerdə öz müştərilərinə evdə hazırlanmış corablar satır.
“Sosial şəbəkə hesablarımızdan da sifarişlər qəbul edirik. İlk sifarişimiz İngiltərədən oldu. Necə sevinirdik, sanki yuxu idi. Yavaş-yavaş Fransadan, İtaliyadan, Almaniyadan, Amerikadan, Kanadadan corablarımızı almağa başladılar. Bəli, bu, Masallıda toxunmuş həmin corablardır. Əl işlərimizi Avropaya, Amerikaya göndəririk. Bu, möcüzə idi. Üstəlik, corabların içinə açıqcalar yerləşdiririk. Onun üzərində məhsulun haradan göndərildiyi, bizim kim olduğumuz və corabı kimin toxuduğu əks olunur”, - deyə həmsöhbətimiz əlavə edir.
Onun sözlərinə görə, ölkəmizdə sahibkarlığın inkişafı sahəsində böyük potensial var. Xüsusilə, qadınlar bu sahədə özlərini inkişaf etdirməlidirlər: “Çalışırıq ki, fərqli geyim və əşyalar da toxuyaq. Bunun üçün dövlət dəstəyindən istifadə etmək istəyirik. Kiçik və Orta Biznesin İnkişafı Agentliyinin (KOBİA) dəstəyindən yararlanmaq üçün müraciət etməyi planlaşdırırıq. İnanırıq ki, müsbət cavab alacağıq və layihəmizin böyüdülməsi, çətinliklərimizin həlli istiqamətində bizə dəstək verəcəklər”.
İlk sifarişini İngiltərədən alan qadın sahibkar: Bu işə 60 manatlıq büdcə ilə başlamışdım
İlkin Adıyev"Yeni həyat" qəzeti,
www.yeniheyet.az
Вернуться назад