Uşaq hüquqları aylığı çərçivəsində "Uşaq hüquqları, narkomanlığa qarşı mübarizə, uşaq əməyinin istismarı" mövzusunda tədbir
12.11. 2026-ci il tarixdə Masallı şəhər 4 saylı tam orta ümumtəhsil məktəbində Masallı Rayon İcra Hakimiyyəti, Sosial Xidmətlər Agentliyinin Lənkəran-Astara regional filialı və rayon Polis şöbəsinin birgə təşkilatçılığı, Masallı rayon Təhsil sektorunun dəstəyi ilə Uşaq hüquqları aylığı çərçivəsində "Uşaq hüquqları, narkomanlığa qarşı mübarizə, uşaq əməyinin istismarı" mövzusunda tədbir keçirilib.
Tədbir Ümummilli Lider Heydər Əliyevin və Azərbaycan Respublikasının suverenliyi, ərazi bütövlüyü uğrunda canından keçən şəhidlərimizin əziz xatirəsinin 1 dəqiqəlik sükutla yad edilməsi ilə başlayıb.
Tədbirdə Masallı Rayon İcra Hakimiyyəti başçısı aparatının böyük məsləhətçisi- Uşaq hüquqlarının müdafiəsi üzrə Komissiyanın məsul katibi Zamin Məmmədov, Sosial Xidmətlər Agentliyinin Lənkəran-Astara regional filialının baş mütəxəssisi İntiqam Bağırov, rayon Polis şöbəsinin YYPÇİTQ-nın baş inspektoru Samid Əliyev, şagirdlər və müəllimlər iştirak edib.
Tədbiri giriş nitqi ilə açan Zamin Məmmədov BMT Uşaq hüquqları Konvensiyasında və ölkə qanunvericiliyində təsbit olunan uşaq hüquqları ilə bağlı geniş məlumat verərək, uşaq hüquqlarının dövlət tərəfindən müdafiə mexanizmlərini şagirdlərin diqqətinə çatdırmışdır.
İntiqam Bağırov uşaq əməyinin istismarı və Sosial Xidmətlər Agentliyinin uşaq hüquqlarının müdafiəsi sahəsində vəzifələri barədə geniş məlumat vermişdir.
Samid Əliyev narkomanlığa qarşı mübarizə, narkotik vasitələrin insanda və cəmiyyətdə yaratdığı fəsadlar barədə geniş nitqlə çıxış edərək, hər kəsin bununla mübarizə aparmalı olduğunu auditoriyanın diqqətinə çatdırmışdır.
Sonda şagirdlərin sualları cavablandırılmışdır.
































