Baş ucaldan oğul

Doğma torpaqlarımızı erməni vandallarından azad etmək uğrunda canlarını qurban verən oğullarla fəxr edirik. Müdriklərdən biri deyir ki, harda şəhid qanı tökülübsə ora Vətən torpağıdır. O torpaq müqəddəsdir. Torpaq – uğrunda ölən varsa Vətəndir. Bu Vətən uğrunda ölüm-dirim mübarizəsinə qalxdılar, ölümün gözünə baxa-baxa irəlilədilər. Füzulini, Cəbrayılı, Xocavəndi, Zəngilanı, Qubadlını, Laçını ... ölkəmizin musiqi beşiyi olan, qartal baxışlı, gözəl Şuşanı aldılar. Tarix yazdılar, qəhrəmanlıq, igidlik tarixi. Dünyanın hərb tarixində görünməyən tarix. Şəhid versələr də bir addım geri çəkilmədilər.

Ölkəmizin şücaətlə başa vurduğu Vətən müharibəsində Masallı gənclərinin qəhrəmaanlığının da öz fəxarətli yeri var.

Bu yazıda onlardan birini oxuculara təqdim edirəm. Şəkildə gördüyünüz bu igid cüssəli, sinəsi medalla dolu, qartal gözlü gənc Masallının Lürən kəndindəndir.

Döyüş yolundan əvvəl ömür yoluna işıq salmaq istəyirəm. 1997-ci il avqustun 28-də dünyaya göz açıb. Zəhmətkeş, ziyalı bir ailədə boya-başa çatıb. Bu evdə dünyaya gələn üç oğul övladından sonuncusudur. 2003-2014-cü illərdə Lürən kənd orta məktəbində təhsil alıb. 2015-ci ildə Vətənə hərbi borcunu verməyə gedib, Aprel döyüşlərində iştirak edib. Müharibənin barıt qoxusunu, zəhmli silahların səsini orada hiss edib. Od-alovu gözü ilə görən Elşən Tovuzda Vətən torpağından pay olmadığını yəqinləşdirib. Odur ki, Aprel döyüşlərində artilleriya ilə düşmən mövqelərini darmadağın etməyi bacarıb. Xüsusi təyinatlı dəstənin ən fəal əsgəri kimi tanınıb.

Hərbi xidmətini başa vurub kəndə qayıdan Elşən Babayev Ali Baş Komandan qismən səfərbərlik elan edəndə o, yenidən səfərbərlik və hərbi çağırış üzrə rayon bölməsinə gələrək orduya yazılmış və 196 nömrəli hərbi hissənin tərkibində əlahiddə tabur dəstəsinə ezam olunub. 052 saylı xüsusi təyinatlı dəstədə Murovdağ silsiləsində bir sıra yüksəkliyin azad edilməsində fərqlənib. Onun möhtəşəm, qorxmaz, Vətən eşqi ilə od-alovlu döyüş yolu alqışa layiqdir. Sonra bu qanlı-qadalı yol Xocavənddən başlayıb Şuşada zəfərlə başa çatıb. Daşaltı əməliyyatında yaralanıb. Qısa müalicədən sonra bu yolu yenidən davam etdirib. Məramı bu olub ki, miskin, lakin məkrli düşmənin Şuşadan çıxarılmasında onun da öz payı olsun. Buna da nail olub. Şuşa şəhərinin işğaldan azad edilməsində hazırlanan mürəkkəb əməliyyatın uğuruna imza atıb. Tuğda, Topxanadakı döyüşlərdə də şücaətini göstərib.

İndi igid Elşənin sinəsini “Hərbi xidmətdə fərqlənməyə görə”, “Xocavəndin azad olunmasına görə”, “Kəlbəcərin azad olunmasına görə”, “Şuşanın azad olunmasına görə”, “Vətən Müharibəsi iştirakçısı” medalları onun döyüş yoluna işıq saçır. Bu gün şücaətli əsgərin atası Nurəddin Babayev oğlunun döyüş yolu ilə qürur duyur.

Gəncliyində Göyçay şəhərində təhsil aldığı zaman könül bağladığı Fəridə xanımla üç oğul övladını ərsəyə çatdırmış, onları əsl vətənpərvər ruhda böyütməyə nail olmuşdur. Evin ilk övladı Hikmət Tovuz döyüşlərinin iştirakçısıdır. Leytenant Hikmət bu döyüşlərdə neçə-neçə Fəxri fərmana layiq görülmüşdür. İki övladı Nurəddini baba deyə çağırır.

Fərid isə hərbi xidmətini Sərhəd qoşunlarında başa vurub. Ömür-gün yoldaşı Fəridənin 6 qardaşı Vətəni düşmənin işğalından qorunmasında iştirak edib. Qardaşı Şəmsi Birinci Qarabağ döyüşlərində şəhid olub. Fəridə xanım deyir ki, bacı kimi, ana kimi qürur duyuram ki, qaraşlarım, oğullarım həmişə başımızı uca ediblər. Övladlarım da mənfur düşməni Qarabağ torpaqlarından qovmaq üçün Vətənin çağırışına vaxtında səs veriblər. Qürur duyuram ki, Elşən oğlum Şuşanın alınmasında igidlik göstərib, Vətən qarşısında başımızı uca edib.

Viləşçay dəryaçısı idarəsində çalışan Nurəddin Babayev redaksiyamızda olarkən oğlu Elşənin Vətən müharibəsindəki döyüş yolundan fəxrlə danışdı. Hər dəfə sinəsindəki medallara baxıb deyirəm: Sağ ol, Elşən, hər yerdə bizə başucalığı gətirən oğul. Şəhidlərimizin qisasını aldığın üçün qəlb rahatlığı keçirirəm, deyirəm, zəhmətim sənə halal olsun.