Masallıda “Qadınların sahibkarlıq fəaliyyətində rolu: imkanlar, çətinliklər və perspektivlər” mövzusunda tədbir

Bu gün, 17:17
Maraqlı

15 avqust 2025-ci il tarixində Masallı şəhər Heydər Əliyev Mərkəzində Masallı Rayon İcra Hakimiyyəti və Azərbaycan Respublikasının Kiçik və Orta Biznesin İnkişafı Agentliyinin təşkilatçılığı ilə 40 yerli sahibkar qadın ilə görüş keçirilib.
Görüşdə “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın təsdiq edilməsi haqqında Azərbaycan Respublikası Prezidentinin 22.07.2022-ci il tarixli 3378 nömrəli Sərəncamının 1.1.6.2-ci tapşırığının-İnvestorların problem və çətinliklərini həll etmək üçün mütəmadi dövlət‒biznes dialoqu çərçivəsinin qurulması, eyni zamanda “Qadınların sahibkarlıq fəaliyyətində rolu: imkanlar, çətinliklər və perspektivlər” mövzularında fikir mübadiləsi aparılmışdır.

Həmçinin görüşdə İqtisadiyyat Nazirliyinin Lənkəran-Astara Regional bölməsi, Azərbaycan Biznesin İnkişafı Fondu, AQTA, ABAD PHŞ, Dövlət Məşğulluq Agentliyi, Peşə Təhsili üzrə Dövlət Agentliyi, Dövlət Vergi Xidməti, Masallı DAİM, Rabitəbank ASC və Azərbaycan Beynəlxalq Bank ASC-nin nümayəndələri də iştirak etmişdir.
Tədbiri giriş sözü ilə açan KOBİA-nın Lənkəran regional koordinatorluğunun Masallı KOB dostu Cavad Əzizov qurumun fəaliyyət istiqamətləri və görülmüş işlər barədə ətraflı məlumat vermiş, hər an qadın sahibkarların yanında olduğunu, lazımi diqqət və qayğının göstərildiyini bildirmiş, bundan sonra da yaranacaq problemlərin həllində yaxından köməklik ediləcəyini onların nəzərinə çatdırmışdır.

Tədbirdə çıxış edən Masallı Rayon İcra Hakimiyyəti başçısı aparatının Sosial-iqtisadi inkişafın təhlili və proqnozlaşdırılması şöbəsinin müdir müavini Niyazi Bağırov qeyd etmişdir ki, “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın təsdiq edilməsi haqqında Azərbaycan Respublikası Prezidentinin 22.07.2022-ci il tarixli 3378 nömrəli Sərəncamının 1.1.6.2-ci tapşırığının-İnvestorların problem və çətinliklərini həll etmək üçün mütəmadi dövlət‒biznes dialoqu çərçivəsinin qurulması bu gün keçirilən tədbirin əhəmiyyətini bir az da artırır. Masallı Rayon İcra Hakimiyyəti rayonun iqtisadiyyatında, məşğulluğun təmin olunmasında sahibkarların, o cümlədən qadın sahibkarların artan rolunu nəzərə alaraq, cəmiyyətdə sahibkarlığa dəstək əhval-ruhiyyəsinin artırılmasına təkan vermək məqsədi ilə hər an onlara lazımi köməkliyi göstərməyə hazırdır.

Daha sonra çıxış edənlər Azərbaycan Biznesin İnkişafı Fondu, AQTA, ABAD PHŞ, Dövlət Məşğulluq Agentliyi, Peşə Təhsili üzrə Dövlət Agentliyi, Dövlət Vergi Xidməti, Rabitəbank ASC və Azərbaycan Beynəlxalq Bank ASC-nin nümayəndələri dövlət dəstəyi və güzəştlərdən, Azərbaycanda qadın sahibkarlar üçün qrantlar, sərmayə fondları, güzəştli kreditlərdən, qadınlara biznes planlaşdırılması, marketinq kimi sahələrdə təlimlər təklif edən layihələrdən, rəqəmsal sahibkarlıq sahəsindən və s. bu kimi vacib məsələlər barədə məlumat vermişlər.

Tədbirin sonunda qadın sahibkarlarla müzakirə aparıldı və onları maraqlandıran suallar aidiyyəti üzrə cavablandırıldı.