Masallının Qızılağac kəndinin köçəri qonaqları

Respublikamız fauna və flora aləmi ilə zəngindir. Ölkəmizin Cənub bölgəsinin əlverişli iqlimi, təbii-coğrafi şəraiti, zəngin bitki örtüyü ilə burada müxtəlif növ quşların da məskən salmasına səbəb olub. Bu ərazilərdə daimi yaşayan quşlarla yanaşı, bəzi fəsillərdə buraya gələn köçəri quşlar da var. Onlardan biri də el arasında “Hacıleylək” kimi tanınan leyləkdir.

Qışda digər isti ölkələrə üz tutan hacıleyləklər havalar isinən kimi yenidən Masallının Qızılağac kəndinə qonaq gəlirlər. Bu quşlar hazırda evlərin damında, elektrik dirəklərinin, hündür ağacların ən uca yerlərində yuva qururlar.

Kənd ərazi nümayəndəsi Elşad Abbasov deyir ki, kənd camaatı bu quşlara heç vaxt toxunmur, əksinə, onların yuva qurmasına şərait yaradır: “Bu quşlar yaşayan ərazidə əkin sahələrində nə ilana, nə də ki, hər hansı bir həşərata rast gəlmək olmur. Qış aylarında isti ölkələrə köç edən hacıleyləklər daha çox Ərəbistan yarımadasında məskən salırlar. Buna görə də müqəddəs torpaqlara uçub gedən, sonra yenə də qayıdan leyləklərə el arasında “hacı” ləqəbi qoşulub və “hacıleylək” adlandırılır”.

El arasında hacıleyləklərlə bağlı müxtəlif inanclar da yaranıb. Hətta belə bir inam mövcuddur ki, qışın son günlərində köçəri quşlar arasında yurdumuza ilk hacıleylək gəlir və bu da Novruz bayramının gəlişini xəbər verir.


“Qızılağac kəndi rayonun böyük kəndlərindən biridir. Bizim kənd hər zaman yazda bu quşların məskəni olmasına görə fərqlənib. Artıq bu quşlara o qədər öyrəşmişik ki, onlar köç edib gedəndə məyus olur, qayıdıb gələndə isə sevinirik. Bu quşlar çox xeyirli quşlardır. Hər zaman Novruz bayramı ərəfəsində kəndə qayıdırlar. Sanki Novruzun, carçılarıdır. Biz hər zaman bu quşlara qayğı və sevgi ilə yanaşırıq. Çalışırıq ki, bu quşlar heç zaman kəndimizdən küsüb getməsinlər", - kənd sakini Sevda Abbasova bildirir.











İlkin Adıyev


“Yeni həyat” qəzeti
www.yeniheyet.azшаблоны для dle 11.2