Xüsusi yeri olan bir dövlət olduğunu. Azərbaycan Qoşulmama Hərəkatında isbat elədi

   

 

  5 İyul 2023-cü il tarixində Bakı Konqres Mərkəzində Qoşulmama Hərəkatının Əlaqələndirmə Bürosunun “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlər görüşü keçirilmişdir. 

Görüşdə çıxış edən Prezident İlham Əliyev Qoşulmama Hərəkatı ölkələrinin yekdil qərarı ilə Azərbaycanın 2019-2022-ci illər üçün sədrliyi öz üzərinə götürdüyünü və yenidən yekdil qərarla sədrliyimizin daha bir il uzadıldığını qeyd etmişdir.

 Azərbaycan Qoşulmama Hərəkatına sədrliyi dövründə “Bandunq prinsipləri” əsasında ədaləti, beynəlxalq hüququ və üzv ölkələrin qanuni maraqlarını qətiyyətlə qoruduğunu söyləyən cənab Prezident,  Beynəlxalq ictimaiyyət COVID-19 pandemiyası ilə necə mübarizə aparacağı barədə çaşqın vəziyyətdə olarkən, misli görünməmiş bu çağırışla mübarizədə qlobal səyləri birləşdirənin Qoşulmama Hərəkatının olduğunu bildirmişdir.

  2020-ci ilin mayında Azərbaycanın təşəbbüsü ilə təşkil edilmiş Qoşulmama Hərəkatının liderlər səviyyəsində onlayn sammiti 2020-ci ilin dekabrında BMT Baş Assambleyasının xüsusi sessiyasının keçirilməsi ilə nəticələnmişdi. Həmçinin cənab İlham Əliyev bildirmişdir ki, Qoşulmama Hərəkatının bəzi zəngin ölkələr tərəfindən yürüdülən “peyvənd millətçiliyi”nə güclü etirazı və bunun ardınca bütün ölkələr üçün peyvəndlərə ədalətli və universal çıxışla bağlı BMT qətnamələrinin qəbul edilməsi                      

Qoşulmama Hərəkatının koronavirusla mübarizədə liderliyinə dəlalət edir. Hərəkatın institusional inkişafı, xüsusən də müvafiq olaraq 2021-ci və 2022-ci illərdə Qoşulmama Hərəkatı Parlament Şəbəkəsinin və Qoşulmama Hərəkatı Gənclər Təşkilatının yaradılması Azərbaycanın sədrliyinin növbəti nailiyyətidir. Hal-hazırda Qoşulmama Hərəkatının qadınlar platformasının yaradılması üzərində işlər gedir. İnstitusional davamlılığa doğru atılan bu addımlarla biz növbəti sədrlərə mütləq uğurlu bir miras qoyacağıq.

 Azərbaycanın bu ilin mart ayında Bakıda Qoşulmama Hərəkatının pandemiyadan sonrakı bərpaya həsr olunmuş növbəti sammitini uğurla təşkil etdiyimizi söyləyən cənab İlham Əliyev, qlobal əhəmiyyətə malik məsələləri müzakirə etdiklərini və pandemiyadan sonrakı dövrdə daha yaxşı bərpa üzrə fikirlərini bölüşdüklərini qeyd etmişdir. Ölkə baçısı eləcə də, ehtiyacı olan ölkələrə yardım göstərilməsinin Azərbaycanın sədrliyinin digər prioriteti olduğunu nəzərə çatdırmışdır. Prezident İlham Əliyev multilateralizmin əsl müdafiəçisi və BMT-dən sonra ikinci böyük təsisat kimi Qoşulmama Hərəkatının yenidən formalaşan dünya nizamında öz yerini tapmasının lazım olduğunu vurğulamışdır. Bildirmişdir ki, “Bandunq prinsipləri” ətrafında qətiyyətlə dayanmalı, suverenliyin və ərazi bütövlüyünün pozulması, ölkələrin daxili işlərinə müdaxilə hallarına qarşı öz səsimizi ucaltmalıyıq. Hərəkatımızın dünya məsələlərində daha ön mövqedə olması mühüm əhəmiyyət kəsb edir.

  Ölkə başçımız həmçinin, sədrliyimiz dövründə Azərbaycan xalqı üçün ən önəmli və yaddaqalan məqamın Vətən müharibəsində bizim tarixi Qələbəmiz olduğunu, 2020-ci ildə Azərbaycanın Ermənistanı döyüş meydanında məğlub edərək Ermənistanın 30 illik işğalına son qoyduğunu xüsusi qeyd etçmişdir. İşğalçı ölkə kimi Ermənistan kapitulyasiya aktını imzalamağa məcbur oldu. Bununla da Azərbaycan öz ərazi bütövlüyünü və tarixi ədaləti bərpa etdi, BMT Təhlükəsizlik Şurasının 1993-cü ildə qəbul etdiyi dörd qətnaməsinin icrasını özü təmin etdi. Azərbaycanın bu Qələbəsi beynəlxalq hüququn və ədalətin zəfəri oldu.

 Qoşulmama Hərəkatının bütün üzv dövlətlərinə həmrəyliklərinə və Azərbaycana sədrliyini uğurla həyata keçirmək üçün göstərdikləri dəstəyə görə təşəkkür edən cənab İlham Əliyev, Qoşulmama Hərəkatının Əlaqələndirmə Bürosunun Bakı nazirlər görüşünə uğurlar arzu etmişdir. Eləcə də, bu görüşün səmərəli və nəticəyönümlü müzakirələrlə yadda qalacağını diqqətə çatdırmışdır.