Qədim kəndin yeni növrağı

Dünən, 15:21
Maraqlı

Müsahibimiz Masallı RİH başçısının Mahmudavar kənd ərazi dairəsi üzrə nümayəndəsi Ağadadaş Qənbərovdur.

Ağadadaş Qənbərov 1964-cü ildə Masallı rayonunun Miyankü kəndində dünyaya göz açmışdır. Miyankü natamam, Hişkədərə tam orta məktəblərini bitirmiş, 1988-ci ildə Azərbaycan İnşaat Mühəndisləri İnstitutunda təhsil almışdır. Viləş Su bəndinin tikintisində mühəndis-hidromelirator işləmişdir. Azərbaycan Meliorasiya və Su Təsərrüfatı ASC-nin Suların İstifadəsi və Mühafizəsinə nəzarət idarəsində mühəndis – hidrotexnik vəzifəsində çalışmışdır. Masallı RİH başçısının 7 aprel 2023-cü tarixli sərəmcamı ilə Mahmudavar kənd ərazi dairəsi üzrə nümayəndəsi təyin edilmişdir.

Ailəlidir, üç övladı var.

-Ağadadaş müəllim, ilk öncə Mahmudavar ərazisi barədə oxuculara tanışlıq verərdiniz.

-Mahmudavar Masallı rayonunnun böyük və abad yaşayış məntəqələrindəndir. Tarixi qədim bu kənd ziyalıları, alimləri, zəhmət adamları ilə ölkədə tanınır. Rüdəkənar, Mahmudavar və Mololon kəndlərini özündə bilərşdirən ərazidə 7800 nəfərdən çox əhali yaşayır. Ərazidə iki tam orta, iki natamam orta məktəb, bir folklor evi, bir kitabxana, həkim məntəqəsi, feldişer-mama məntəqəsi, poçt, ATS, iki aptek, iki şadlıq evi, ölkədə tanınan “Baba bulağı” təbiət evi, 72 market və ictimai iaşə obiyekti maşın təmiri sexi, iki futbol meydançası və s. fəaliyyət göstərir. Bu sosial-içtimai obiyektlər isə kəndə işsizliyin aradan qaldırılmasına kömək edir, 966 hektara yaxın torpaq sahəsinə malik ərazidə taxıl, tərəvəz bitkiləri yetişdirilir, beş hektar çay tarlası mövcuddur, 10 hektardan çox sitrus bağı vətəndaşlara və fermerlərə məxsus xeyli mal-qara vardır.

- İndi ölkədə abadlıq-quruculuq işləri geniş vüsət alıb. Bu sahədə ərazidə vəziyət necədir?

- Cənubdan Lənkəran rayonu, şimaldan isə rayonumuzun Türkoba kəndi ilə həmsərhəd olan kəndimizin abadlığı, gözəlliyi elə ilk görüntüdən seçilir. Yaraşıqlı evlər, abad küçələr, müasir sosial obiyektlər kəndin son illər xeyli dəyişdiyindən xəbər verir. Deyə bilərəm ki, hər günkü işimizin əsas hissəsini kəndin abadlığına sərf edirik, Bunun üçün kəndin ağsaqqaları, ziyalı və xeyriyyəçi adamları ilə əlaqə saxlayır, görüşürük. Kəndin abadlıq və səliqə-sahman işlərində onlar yaxından iştirak edirlər. 2024-cü ildə ən yaxşı uğurumuz kənd küçələrinin asfaltlaşdırılması olub. Bu sahədə işimiz nöqsanlı idi, çala-çuxur yollar sakinləri narahat edirdi. Rayon icra hakimiyyətinin təşəbbüsü və dəstəyi ilə küçələrin abadlaşdırılmasına başladıq. Bu vacib işin ünvanı Vətən, torpaq uğrunda şəhid olanların adlarını daşıyan küçələr oldu. İkinci Qarabağ müharibəsinin şəhidləri Nayıb Qasımov küçəsində 729 kvadratmetr, Röyad Məmmədov küçəsində 1939 kvadratmetr sahə asfaltlaşdırıldı. Birinci Qarabağ şəhidi Mübariz Şahbazovun valideynlərinin yaşadığı evə gedən 403 kvadratmetrlik yola da asfalt döşənib. Bir neçə küçə isə kənd xeyriyyəçilərinin vəsaiti hesabına asfaltlaşdırılıb. Bundan başqa ərazi nümayəndəliyinin təşəbbüsü ilə Rüdəkənar kəndində şəhid Məmməd Nəhmətovun atasının yaşadığı küçə qreyderlə hamarlanmış, çınqıl tökülmüşdür. Mololon kəndinin ara küçələrinə 4 kamaz çınqıl sərilmişdir. Mahmudavarda isə küçələrə 40 kamaz çınqıl tökülüb yayılmışdır.

Kəndin Lənkəran rayonu ilə sərhəddindəki tanıtma lövhəsini əsaslı təmir etməyə nail ola bilmişik.

-Bu il ölkədə tarixə düşən COP 29 tədbiri keçirildi.

-Əlbəttə, bu tədbir Azərbaycan üçün çox önəmli idi. Dünyanın neçə-neçə ölkəsindən gəlib bu vacib konfransda iştirak edirdilər. Ölkənin bu sahədəki işi çoxlarına nümunə oldu. Həmin günlərdə kəndin yuxarı başındakı zibil poliqonu daşınıb ləğv edildi. İndi həmin yerdə kəndin imkansız sakini naringi bağı salıb. Çaylarda, yolların qırağındakı məişət tullantılarının təmizlənməsinə nail olduq. Cənab Prezidentimizin tapşırığı əsasında müxtəlif müəssisələrin həyətində 350 küknar və şam ağacı əkdik, mühafizəsini təşkil etdik

- Təhsil xalqımızın gələcək inkişafında ən önəmli sahədir.

-Bizdə bu sahəyə diqqət və qayğı mütəmadidir. Kənddəki dörd məktəbin birinin istilik sistemi var, üç məktəbin isə odunla təchizatına kömək edirik. Kənd bələdiyyəsi ilə təhsil müəssisələrinə mütəmadi nəzarət və dəstək var.

-Vətənpərvərlik hər birimiz üçün vacib hissdir. Gənclərin hərbi çağırışlara hazırlanmasında işiniz

-Bu sahədə işimiz nümunəvidir gənclərimiz hərbi çağırışlara könüllü gedirlər. Hərbidən yayınanlarımız yoxdur. Gənclərin istirahət vaxtlarının xoş keçməsi üçün kənddə bir sıra idman qurğusu yaradılıb, stadion həmişə diqqətdədir. Bundan başqa Ağsaqqallar bağında şahmat, dama yarışları keçirilirdi. Bir sıra kütləvi tədbirlərdə onların iştirakı təmin olunur. Bu il Ulu Öndərin, şəhidlərin anım günlərindəki tədbirlər yüksək səviyyədə keçirilib.

-Görürəm ki, 2024-ci ildə Mahmudavar uğurlu tarixini təkrarlayıb. Sizə, mahmudavarlılara yeni ildə daha böyük uğurlar arzulayırıq. Müsahibə üçün sağ olun.

-Siz də sağ olun.