Azərbaycan mətbuatı – 150

O SÖZ QƏZETDƏ DÜZ YAZILIB...

Bir neçə gündən sonra Azərbaycan milli mətbuatının 150 yaşı tamam olur.

Azərbaycanda birinci mətbu orqanın - əsası Həsən bəy Zərdabi tərəfindən qoyulmuş "Əkinçi" qəzetinin nəşrə başladığı 22 iyul Azərbaycanda Milli Mətbuat Günü kimi qeyd olunması artıq ənənə şəklini almışdır.

"Əkinçi" 1875-ci il iyulun 22-dən 1877-ci ilin sentyabrınadək çap olunmuşdur. 

Ötən bütün zamanlar Azərbaycan mətbuatı daim cəmiyyətin proseslərə baxışını əks etdirən güzgüyə çevrilib. 1998-ci ilin avqustunda Ümummilli Lider Heydər Əliyevin Sərəncamı ilə senzuranın ləğvi isə Azərbaycanda mətbuatın inkişafına böyük töhfə verib. Müstəqillik dövründə Azərbaycan mətbuatı ilə bağlı ilk Fərman da məhz Heydər Əliyev tərəfindən imzalanıb. 2000-ci il martın 27-də imzalanan "Azərbaycanda milli mətbuatın yaradılmasının 125 illiyi" haqqında Fərmanla ölkəmizdə demokratik mətbuatın yaradılmasının 125 illiyi geniş şəkildə qeyd olunub. Beləliklə, Ümummilli Lider mətbuatın problemlərinin həlli ilə bağlı ondan çox sərəncam və fərman imzalayıb.

Ümummilli Liderin mətbuata belə qayğısı jurnalistlər tərəfindən də yüksək dəyərləndirildi. Heydər Əliyev 2002-ci il martın 22-də "RUH" Azərbaycan Jurnalistləri Müdafiə Komitəsi tərəfindən "Jurnalistlərin dostu" mükafatına layiq görüldü.

Bu gün müstəqil mətbuatın formalaşması və inkişafına xidmət edən siyasəti möhtərəm Prezidentimiz İlham Əliyev uğurla davam etdirir. Milli mətbuatın inkişafındakı xidmətlərinə görə jurnalistlərin fəxri adlarla təltif edilməsi haqqında sərəncamlar da mətbuata və bu sahədə çalışanlara göstərilən qayğının tərkib hissəsidir.

Azərbaycan Prezidenti İlham Əliyev hər beş ildən bir milli mətbuatımızın yubileyinin təntənə ilə keçirilməsini ənənəyə çevirib. Mətbuat nümayəndələri fəxri adlara və mükafatlara layiq görülüblər, kütləvi informasiya vasitələrinə maddi yardım ayrılıb. Azad mətbuatın inkişafı dövlət siyasətində prioritetdir.

Təsadüfi deyil ki, 2010-cu il dekabrın 1-dən 20-dək "RUH" Azərbaycan Jurnalistləri Müdafiə Komitəsi 2010-cu ildə "Jurnalistlərin dostu" mükafatı qalibinin müəyyənləşdirilməsi ilə bağlı KİV və jurnalist təşkilatları arasında keçirdiyi sorğunun nəticələrinə əsasən, Prezident İlham Əliyev kütləvi informasiya vasitələrinin inkişaf etdirilməsi sahəsindəki xidmətlərinə görə "Jurnalistlərin dostu" mükafatına layiq görülüb.

Mətbuat günü təkcə jurnalistlərin yox, bütövlükdə cəmiyyətimizin bayramıdır. Çünki azad söz azad cəmiyyətin təməl daşıdır. Bütün bu işlərdə bölgə mətbuatı, xüsusilə rayon qəzetləri, onun müxbirləri hər bir bölgənin işıqlanmasında əhaliyə yaxın olduğuğundan problemlərini, nailiyyətlərini yazılı mətbuatada arxivləşdirməyə nail olmuşlar.

 İstər Birinci, istərsə də ikinci Qarabağ müharibələrinin qəhrəmanlıq dastanlarının yazılmasında çox fəal olmuşlar. Maddi çətinliklərimiz çoxdur, buna baxmayaraq müxtəlif illər üzrə çalışdığım “Yeni həyat” qəzetinin saralmış vərəqlərdəki nüsxələri Masallı tarixinin yaddaşına çevrilir. Bəli, biz Masallıda gözəl mətbuat ənənlərini yaşatdıq, rayonun tarixini yazdıq, oxuculara sevdirdik və bu gün də həmin ənənəni davam etdrməyə çalışırıq. Amma, deyim ki, rayon mətbuatının bu ağır vəziyyətində qəzet çap etdirmək çox çətindir. Onda sual olunur, müasir rayon həyatının bu gününü kim yazacaq, kim vəsf edəcək, arxivləşdirəcək? Elektron yazılar, saytlar çox qala bilməz tarixdə... Qəzet hər zaman qalacaq. Ən məşhur jurnalistlər, ən böyük yazıçılar qəzetlərin şinelindən çıxanlardır. Qəzet redaktə olnur, bir yazı bəzən bir neçə əməkdaş tərəfindən yoxlanılr, pozulur, yazılır, düzəlişlər edilir. Yazı var, bəzən bir yazı on dəfə oxunur, hazır olanı qəzetdə görünür... 

Uşaqlıqdan indiyə kimi şahidi olmuşam ki, söz üstündə mübahisə düşəndə ən zəkalı müəllimlər, mövqeli insanlar, əlaçı tələbələr deyiblər ki, o söz düz yazılmayıb, qəzetdə belə yazılıb... Biz məktəb oxuyanda bütün siniflər “Azərbaycan gəncləri” qəzetini, “Azərbaycan”, “Ulduz” jurnallarını səbirsizliklə gözləyərdik, və sosial mənşəyindən asılı olmayaraq həmin mətbuata abunə yazsılardıq. Adı da könüllü idi. Amma, abunə olmalıydın... Bədbəxtçilik onda idi ki, həmin rayonun ziyalısı bilməyəydi ki, yaşadığı rayonda hansı adda qəzet çıxır. Həmin adam el qınağına çevrilərdi. Bəs, indi?.. 

Heç bir müasir texnologiya qəzet varintı kimi məhsul verə bilməz, əksinə sözə məsuliyyətsizlik, urvatsızlıq yaranacaq. Bizim də eyni adlı qəzetin saytı var. Sayt kağız deyil, birdəfəlik olur. Bir dəfə oxudun qurtardı. Amma, qəzeti oxumaq başqa zövqdür. Çox çətinliklə, az abunəiliklə, az tirajla çörək qazanmaq olmur. Çoxları elə bilir ki, biz jurnalistlər çörək yemirik. Biz də çörək yeyirik, çay içirik...