Masallıda “Yaşıl torpağın azadlığı” adlı tədbir
- 21-10-2025, 17:03
- Maraqlı
- 0
- 177
21 oktyabr 2025-ci il tarixdə Masallı Dövlət Regional Kollecində “Qəhrəmanlarımızı tanıyaq” layihəsi çərçivəsində “Zəngilan və Qubadlı Şəhərləri Günü” münasibətilə “Yaşıl torpağın azadlığı” adlı tədbir keçirildi.
Masallı Rayon İcra Hakimiyyəti, Masallı Rayon Tarix-diyarşünaslıq Muzeyi, Masallı Dövlət Regional Kolleci və Azərbaycan Respublikası Müharibə, Əmək və Silahlı Qüvvələr Veteranları Təşkilatının Masallı rayon təşkilatının birgə təşkilatçılığı ilə keçirilən tədbirdə 44 günlük Vətən Müharibəsi iştirakçıları və gənclər iştirak etdilər.
Tədbir Ulu Öndər Heydər Əliyevin və Azərbaycan Respublikasının suverenliyi və ərazi bütövlüyü uğrunda canlarından keçən şəhidlərimizin əziz xatirəsinin 1 dəqiqəlik sükutla yad edilməsi ilə başladı.
Tədbiri giriş sözü ilə açan Tarix-diyarşünaslıq Muzeyinin direktoru Əntiqə Tağıyeva tədbir iştirakçılarını salamlayaraq, cənab Prezident İlham Əliyevin Sərəncamı ilə təsis olunan Zəngilan və Qubadlı Şəhəri Günləri münasibətilə hamını təbrik etdi. Ə.Tağıyeva bildirdi ki, 20 Oktyabr – Zəngilan, 25 Oktyabr-Qubadlı şəhərinin Ermənistan silahlı qüvvələrinin 27 illik işğalından azad edildiyi gündür. O, çıxışında vurğulayıb ki, Azərbaycanın 44 günlük Vətən müharibəsi zamanı qazandığı tarixi zəfər milli dövlətçilik baxımından böyük naillyyətdir. Qarabağın 30 ildən artıq davam etmiş işğal günləri tarixə qovuşub, xalqımız uzun müddət arzusunda olduğu qələbənin sevincini yaşayır.
Sonra çıxış edən Rayon İcra Hakimiyyətinin İctimai-siyasi və humanitar məsələlər şöbəsinin müdir vəzifəsini müvəqqəti icra edən Nuranə Muradova 1993-cü il oktyabrında Ermənistan tərəfindən işğal olunan Zəngilan rayonunun 27 ildən sonra, məhz oktyabr ayında işğaldan azad olunduğunu, Zəngilan döyüşlərinin İkinci Qarabağ müharibəsində Azərbaycan Ordusunun qələbəsi ilə nəticələnən ən uğurlu Arazboyu əməliyyatlarından biri olduğunu qeyd edib. 2022-ci il oktyabrın 20-də Zəngilan Beynəlxalq Hava Limanının açılış mərasimində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan açılış mərasimində iştirak ediblər. Artıq Zəngilan aeroportuna Beynəlxalq Hava Limanı statusu verilib. Bu, Azərbaycanın Şərqi Zəngəzur iqtisadi rayonunda inşa edilən ilk, işğaldan azad olunan ərazilərdə isə ikinci hava limanıdır.
Zəngilan rayonunun düşmən işğalından təmizlənməsi Şərqi Zəngəzurun qərb sərhədində dağlıq ərazidəki Qubadlıya gedən yolun açılmasında əhəmiyyətli rol oynayıb.
Bölgədə ən gərgin döyüşlərin getdiyi yerlərdən biri Yazı düzü yüksəkliyi olub. Strateji əhəmiyyətə malik həmin yüksəkliyin erməni quldur birləşmələrindən azad edilməsi uğrunda gedən döyüşlər zamanı Azərbaycanın Milli Qəhrəmanı polkovnik Şükür Həmidov şəhidlik zirvəsinə ucalıb.
Qubadlı əməliyyatı, həmçinin ovaxtkı Laçın dəhlizinə və Gorus-Qafan yoluna nəzarəti ələ almağa imkan verib.
Daha sonra Azərbaycan Respublikası Müharibə, Əmək və Silahlı Qüvvələr Veteranları Təşkilatının Masallı rayon təşkilatının sədri Ramiz Tağıyev I Qarabağ müharibəsi ilə II Qarabağ müharibəsinin müqayisəsindən, II Qarabağ münaqişəsinin ədalətli həll olunmasında dövlət başçısı, Ali Baş Komandan İlham Əliyevin məqsədyönlü və qətiyyətli siyasətinin mühüm rolundan, işğaldan azad olunan torpaqlarda həyata keçirilən yenidənqurma və bərpa işlərindən geniş danışıb.
Tədbirin davamında “Qarabağ” və “III dərəcəli Rəşadət” ordenli, 44 günlük Vətən Müharibəsi iştirakçısı Nazim Cəfərzadə Azərbaycanın ərazi bütövlüyü və suverenliyinin bərpa olunmasının tarixi əhəmiyyətindən, qələbənin sürətlə gerçəkləməsində dövlət, xalq və ordu arasında sarsılmaz vəhdətin, əsgər və zabitlərimizin misilsiz şücaətinin mühüm amillər olmasından, artıq beşinci ildir ki, üçrəngli bayrağımızın işğaldan azad edilən ərazilərdə qürurla dalğalandığı, qəhrəman xalqın qalib ölkəsi, heç bir yerdən kömək gözləmədən Qarabağı və Şərqi Zəngəzuru yenidən quran, düşmənin dağıtdığı və taladığı şəhərlərə, kəndlərə ikinci həyat verən, dünyada sülh carçısı kimi tanınan Azərbaycan tarixinin ən şərəfli səhifəsini 44 günlük müharibədə yazdığından danışdı.
Daha sonra Masallı Dövlət Regional Kollecinin direktor müavini Dilarə Hüseynova çıxışında bildirdi ki, döyüş meydanında Müzəffər Ordumuz bütün şəhidlərimizin qisasını alıb: “İndi bütün azad edilmiş bölgələrimiz kimi Zəngilanda, Qubadlıda böyük quruculuq işləri icra edilir. Bu da qubadlıların çox qısa zamanda öz yurd-yuvalarına dönüb əbədi, xoşbəxt yaşamasına zəmin yaradır. Hər bir qarış torpağımızın azad edilməsi sözsüz ki, xalqımız üçün böyük qürur və iftixar hissi ilə qarşılanırdı. Tarixi ərazilərimizin düşmən tapdağından azad edilməsi uğrunda canını fəda etmiş oğullarımız bu gün böyük hörmət və ehtiramla yad edilir.
Tədbirin davamında Masallı Dövlət Regional Kollecinin II kurs tələbəsiHüseyn Qasımov qeyd etdi ki, 27 il ərzində oktyabr ayı Azərbaycanın dilbər guşələrindən olan Zəngilan və Qubadlı rayonlarının işğal tarixi kimi qeyd olunurdu. Artıq həmin günlər geridə qaldı. 27 ildən sonra Müzəffər Ali Baş Komandan İlham Əliyevin rəhbərliyi ilə rəşadətli Ordumuz Vətən müharibəsində yeni tarix yazıb. Qubadlı əməliyyatı xüsusi peşəkarlıq və fədakarlıq tələb edirdi. Azərbaycan Ordusu bu peşəkarlığı, fədakarlığı göstərib.Həmçinin Müzəffər Ali Baş Komandanın rəhbərliyi ilə Vətən müharibəsində “Üç nöqtə” əməliyyatı xüsusilə bölmələrimizin uğuru ilə nəticələnib.
Masallı Dövlət Regional Kollecində təşkil olunmuş Füzuli Şəhəri Günü münasibətilə “Yaşıl torpağln azadlığı” adlı tədbir orda iştirak edən 44 günlük Vətən Müharibəsinin iştirakçılarının Fəxri Fərmanla təltif edilməsi ilə yekunlaşdı. Sonda iştirakçılar xatirə şəkilləri çəkdirdilər.
