Xalqımızın milli qürur və sarsılmaz birlik günü
- Bu gün, 13:34
- Maraqlı
- 0
- 9
27 Sentyabr Anım Günü xalqımızın milli qürur, həmrəylik və sarsılmaz birlik günüdür. 2020-ci ilin bu tarixində başlayan Vətən Müharibəsi Azərbaycanın çoxəsrlik tarixinə qızıl hərflərlə yazıldı. Bu müqəddəs savaş təkcə torpaqlarımızın azad edilməsi ilə nəticələnmədi, həm də Ali Baş Komandan İlham Əliyevin rəhbərliyi altında "Dəmir Yumruq" ətrafında birləşən xalqımızın sarsılmaz iradəsini bütün dünyaya nümayiş etdirdi.
Vətən Müharibəsində qazanılan qələbənin ən mühüm amili dövlət başçısı ilə xalq arasındakı möhkəm etimad və birlik idi. Prezident İlham Əliyevin qətiyyətli siyasi iradəsi, diplomatik məharəti və xalqa müraciətlərindəki ruhlandırıcı çağırışları hər bir azərbaycanlıda böyük bir inam yaratdı. Müharibə dövründə ön cəbhədə rəşadətli ordumuz düşmənə sarsıdıcı zərbələr vurarkən, arxa cəbhədə milyonlarla insan eyni amal uğrunda birləşdi.Bu birlik sadəcə bir şüar deyil, real bir güc idi: Ali Baş Komandanın ətrafında sıx birləşən xalq, siyasi baxışlarından, etnik və dini mənsubiyyətindən asılı olmayaraq tək bir yumruq kimi çıxış etdi.Azərbaycanın hər bir bölgəsindən olan vətəndaşlar, xaricdə yaşayan soydaşlarımız haqq səsimizin dünyaya çatdırılması və ordumuza dəstək üçün səfərbər oldu.
27 Sentyabr günü canını Vətən uğrunda fəda etmiş şəhidlərimizin xatirəsinə ehtiram əlaməti olaraq təsis edilib. Onların qanı hesabına qazanılan bu qələbə xalqımızın birliyini daha da əbədiləşdirdi.Prezident İlham Əliyevin rəhbərliyi ilə qazanılan bu qələbə xalqımızın tarixinə qızıl hərflərlə yazılmışdır:"Mən xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Bu gün şəhidlərimizin, Ulu Öndərin ruhu şaddır!"
Bu gün biz şəhidlərimizin əziz xatirəsini ehtiramla anarkən, həm də bu birliyin və zəfərin əbədi qoruyucusu olduğumuzu dərk edirik.
27 Sentyabr Anım Günü bizə hər zaman xatırladır ki, milli birlik və Liderə olan inam ən çətin hədəflərə çatmağın və müstəqilliyimizi əbədi qorumağın əsas təminatıdır
Mürvət Abbasov,
Tarix üzrə fəlsəfə doktoru, X.Məmmədov adına Xırmandalı kənd orta məktəbinin müəllimi.
