Masallıda “Zəfər yolu” sənədli filmi nümayiş olunub
- 28-12-2021, 18:44
- Mədəniyyət
- 0
- 383
Masallıda “Zəfər yolu” sənədli filmi nümayiş olunubMasallı Rayon Mədəniyyət Mərkəzində Vətən müharibəsində qazanılmış möhtəşəm Qələbəyə həsr olunmuş “Zəfər yolu” sənədli filmin nümayişi olub.
"Masal Production"un istehsalı olan "Zəfər yolu" adlı ekran əsərinin nümayişində Milli Məclisin deputatları, rayon rəhbərliyi, yerli icra hakimiyyəti orqanlarının rəhbərləri, şahid ailəsinin üzvləri, qazilər və ictimaiyyətin nümayəndələri iştirak ediblər.
Tədbirdə Azərbaycan Respublikasının ərazi bütövlüyü və suverenliyi uğrunda canından keçmiş şəhidlərin əziz xatirəsi bir dəqiqəlik sükutla yad edilib.
Filmin nümayişindən əvvəl çıxış edən Masallı Rayon İcra Hakimiyyəti başçısı Şahin Məmmədov, Milli Məclisin deputatları Anar İsgəndərov və Məşhur Məmmədov filmin yaradıcı kollektivini uğurlu ekran işinə görə təbrik ediblər.
Natiqlər sənədli filmdə toxunulan məsələləri cəmiyyət üçün əhəmiyyətli hesab edərək filmin böyüməkdə olan yeni nəslin hərbi-vətənpərvərlik tərbiyəsi, tarix duyumu və vətəndaşlıq şüurunun formalaşmasında vacib rola malik olacağını qeyd ediblər.
Sonra sənədli film nümayiş etdirilib.
Ekran əsərində Vətən müharibəsi zamanı milli həmrəylik, xalq-ordu birliyi, əldə olunmuş tarixi Zəfər və digər mövzular barədə tarixçi-alimlərin, Milli Məclisin deputatlarının və tanınmış ictimai xadimlərin fikirlərinə yer verilib, Vətən müharibəsi iştirakçılarının həyat və döyüş yolundan bəhs olunub.
Qeyd edək ki, sənədli filmin ideya və ssenari müəllifi "Masal Production"un rəhbəri Cəfər Cəfərovdur. Filmin quruluşu Elsevər Əliyev, montajı isə Faiq Mirzəyə aiddir.
