Güclü Ordu-Güclü Dövlətin təməlidir

 

              Azərbaycan xalqının dövlətçilik tarixində mühüm və qürurverici səhifələrdən biri də 26 İyun – Silahlı Qüvvələr Günüdür. Bu gün, 1918-ci ildə Azərbaycan Xalq Cümhuriyyəti hökumətinin qərarı ilə ilk müntəzəm ordu hissələrinin yaradılması ilə bağlıdır. Məhz həmin tarixi qərar müasir Azərbaycan ordusunun bünövrəsini təşkil etmişdir.

            Cümhuriyyətin süqutundan sonra uzun illər ərzində xalqımız müstəqil ordudan məhrum olsa da, 1991-ci ildə dövlət müstəqilliyinin bərpası ilə Azərbaycan Silahlı Qüvvələrinin yenidən formalaşdırılması zərurəti meydana çıxdı. Azərbaycan Silahlı Qüvvələrinin təkmilləşdirilməsi prosesinə isə Ümummilli Lider Heydər Əliyevin 1993-cü ildə xalqın təkidli tələbi ilə siyasi hakimiyyətə qayıdışından sonra başlanılıb. Qısa müddətdə ordumuzun strukturu tam formalaşdırılıb, bütün növ hərbi birləşmələr yaradılaraq komplektləşdirilib. Ulu Öndərin 1993-cü ildə ali hakimiyyətə ikinci qayıdışından sonra həyata keçirdiyi tədbirlər, ümumilikdə, Azərbaycan Silahlı Qüvvələrinin inkişafında yeni mərhələ olub.

             Onun uzaqgörən siyasəti nəticəsində ordu quruculuğu prioritet sahəyə çevrildi və Silahlı Qüvvələrin təməl prinsipləri formalaşdırıldı. Nəticədə silahlı qüvvələrimiz dünyanın ən müasir silah-sursatları, hərbi-texnoloji avadanlıqları ilə təmin olunub, şəxsi heyətin döyüş ruhu dəfələrlə yüksəldilib. Ölkə Prezidenti cənab İlham Əliyev demişdi: “Ulu Öndərimizin siyasi fəaliyyətinin Naxçıvan dövründə həyata keçirdiyi tədbirlər, hazırladığı siyasi sənədlər təkcə Naxçıvanın yox, eyni zamanda, doğma Azərbaycanımızın da xilasına xidmət edirdi. Üçrəngli dövlət bayrağının, digər milli dövlətçilik atributlarının qəbul edilməsi, milli ordu quruculuğuna başlanılması, aqrar islahatların həyata keçirilməsi - böyük ömrün Naxçıvanda keçən 3 ili ərzində görülən bütün bu tədbirlər müstəqil dövlətimizin daha da möhkəmlənməsinə yönəlmiş milli inkişaf konsepsiyasının tərkib hissələri idi”.

              Bu gün Azərbaycan Ordusu yalnız ölkə daxilində deyil, həm də beynəlxalq aləmdə nüfuz qazanmış, müasir texnika ilə təchiz olunmuş və yüksək döyüş qabiliyyətinə malik bir hərbi quruma çevrilmişdir. 44 günlük Vətən müharibəsi Azərbaycan Ordusunun gücünü və xalqın birliyini bütün dünyaya nümayiş etdirdi. Ali Baş Komandan İlham Əliyevin rəhbərliyi ilə həyata keçirilən uğurlu hərbi əməliyyatlar nəticəsində torpaqlarımız işğaldan azad edildi və ölkəmizin ərazi bütövlüyü təmin olundu.

              Ordunun gücü təkcə silahla ölçülmür – bu gücün əsasında vətənpərvərlik, fədakarlıq, yüksək mənəvi ruh dayanır. Bugünkü gənclərimiz ordu sıralarında xidmət etməklə Vətənə olan borclarını yerinə yetirir, Azərbaycanın müdafiəsi üçün daim hazır olduqlarını sübut edirlər.Silahlı Qüvvələr Günü – təkcə bir təqvim günü deyil, bu, xalqın ordusuna olan ehtiramının, hörmətinin və inamının təcəssümüdür. Azərbaycan Ordusu ölkənin suverenliyinin və təhlükəsizliyinin qarantıdır. Ordumuzun qazandığı nailiyyətlər təkcə hərbi sahədə deyil, eyni zamanda dövlətin möhkəmlənməsində də əhəmiyyətli rol oynayır. Xalqımıza tarixində ən böyük Qələbə hissini yaşadan Azərbaycan Silahlı Qüvvələri bundan sonra da ölkəmizin müstəqilliyinin, ərazi bütövlüyünün qorunmasına öz töhfəsini verəcək. Ümummilli Liderimiz Heydər Əliyevin də dediyi kimi: “Ordu ölkəmizin, millətimizin, dövlətimizin müstəqilliyinin dayağıdır!”

 

Yaşasın Azərbaycan Ordusu! Yaşasın müstəqil və qüdrətli Azərbaycan!