Masallıda Dövlət Bayrağı və Konstitusiya günləri qeyd olundu

Masallıda Dövlət Bayrağı və Konstitusiya günləri qeyd olundu

Noyabrın 8-də Masallı şəhərindəki Bayraq Meydanında 9 Noyabr - Dövlət Bayrağı Günü və 12 Noyabr - Konstitusiya Gününə həsr olunmuş tədbir keçirilib.
Tədbirdə Masallı Rayon İcra Hakimiyyətinin başçısı Rafil Hüseynov, icra hakimiyyəti aparatının kollektivi, YAP rayon təşkilatı idarə heyətinin üzvləri, rayonun hüquq-mühafizə orqanları, idarə, müəssisə və təşkilat rəhbərləri, ictimaiyyət nümayəndələri iştirak edib.
Bayram tədbirində çıxış edən Masallı Rayon İcra Hakimiyyətinin başçısı Rafil Hüseynov rayon sakinlərini qarşıdan gələn əlamətdar günlər münasibətilə təbrik edib.
Rayon rəhbəri bildirib ki, ölkəmizdə dövlət rəmzlərinə ən yüksək səviyyədə hörmət və ehtiramın göstəricisidir ki, 2007-ci ilin noyabr ayının 17-də Azərbaycan Respublikası Prezidenti cənab İlham Əliyev Azərbaycan Dövlət Bayrağı meydanının yaradılması haqqında Sərəncam imzalamış, 2009-cu ilin noyabr ayının 17-də isə 9 Noyabr -Azərbaycan Dövlət Bayrağı günü təsis edilmişdir. Bu iki tarixi qərarın noyabr ayının 17-də verilməsi heç də təsadüfi deyildir. Belə ki, 1920-ci ildə Azərbaycanın işğalı nəticəsində səmalarımızdan endirilən və 70 il boyunca Azərbaycan xalqının qəlbində dalğalanan üç rəngli bayrağımız ilk dəfə məhz 17 noyabr 1990-cı ildə ulu öndər Heydər Əliyev tərəfindən Naxçıvan Muxtar Respublikasının Ali Məclisində qaldırılmış və Dövlət Bayrağı kimi qəbul edilmişdir. Bu hadisə Azərbaycan xalqının müstəqillik və azadlıq mübarizəsinə böyük təkan vermişdir.
Bu gün ən yüksək zirvələrdə dalğalanan üçrəngli bayrağımız Azərbaycan dövlətinin gücünü və xalqımızın milli birliyini nümayiş etdirir.
Əminik ki, Ali Baş Komandanımız cənab İlham Əliyevin rəhbərliyilə Azərbaycan ərazi bütövlüyünü bərpa edəndən sonra milli dövlət bayrağımız bu gün hələ də işğal altında olan torpaqlarda qaldırılacaqdır. Bizim bayrağımız Dağlıq Qarabağda, Xankəndidə, Şuşada dalğalanacaqdır.
Üçrəngli bayrağımız Azərbaycanımızın müstəqilliyinin, xalqımızın milli mənsubiyyətinin, tarixinin, mənəvi dünyasının rəmzidir. Hər bir Azərbaycan vətəndaşı bayrağımıza ehtiram göstərir, bunu özünün müqəddəs borcu kimi qəbul edir. Üçrəngli bayrağımız hər zaman əbədi olacaq, bütün dünyada Azərbaycan dövlətinin və xalqının imzasını qürurla təsdiqləyəcəkdir.
1995-ci ilin mayında ulu öndər Heydər Əliyevin sədrliyilə Konstitusiya Komissiyası formalaşdırıldı. Birmənalı şəkildə demək olar ki, layihənin müəllifi ümummilli lider Heydər Əliyevin özü idi. Hər bir fəsil və maddənin yazılmasına qədər gərgin əmək sərf edən ulu öndərin müəllifi olduğu bu layihə 1995-ci ilin oktyabrın 15-də ümumxalq müzakirəsi üçün mətbuatda dərc olundu. Cəmiyyətin demək olar ki, bütün təbəqələri müzakirələrə cəlb edildi. Təkliflər nəzərə alınmaqla layihənin yekun variantı 1995-ci ilin noyabrın 12-də referendum yolu ilə qəbul edildi.
Konstitusiyanın mühüm fəlsəfi özəlliyi Azərbaycanda daha öncə heç bir hüquqi sənəddə belə geniş şəkildə yer almayan vətəndaş hüquq və azadlıqlarına dair ayrıca fəslin olmasıdır. Konstitusiyanın 158 maddəsindən 60-ı, yəni üçdə birindən çoxu məhz bu sahəni əhatə edir. Lakin bu müddəaların konstitusiyada təsbit olunması ilə məsələ bitmir, 1995-ci ildən sonra Azərbaycan dövləti bu istiqamətdə zəruri hüquqi islahatlar və demokratikləşmə yolu keçmişdir.
Masallı Rayon Gənclər və İdman İdarəsinin rəisi Camal Manafov məruzəsində qeyd edib ki, hər bir dövlətin bayrağı həmin ölkənin, millətin kimliyini, milli-dini mənsubiyyətini, hansı amallar uğrunda mübarizə apardığını ifadə edən xüsusi qürur mənbəyidir. Azərbaycan Respublikası müstəqilliyini bərpa etdikdən sonra Azərbaycanın Dövlət Bayrağı milli suverenliyin simvolu kimi ölkəmizin bütün vətəndaşları üçün müqəddəs dövlətçilik rəmzlərindən birinə çevrilib. Bu gün ulu öndər Heydər Əliyev tərəfindən əsası qoyulan və Prezident İlham Əliyev tərəfindən uğurla davam etdirilən siyasi kurs Azərbaycanın üçrəngli bayrağının dünyanın ən aparıcı tribunalarında, ən ali tədbirlərində dalğalanmasını təmin edib.
YAP Masallı Rayon Təşkilatı Qadınlar Şurasının üzvü Lətifə Qənbərzadə, SHXÇDX rayon şöbəsinin Həqiqi hərbi xidmətə çağırış bölməsinin müfəttişi Ülvi Hüseynli və başqaları çıxışlarında qeyd ediblər ki, dövlət rəmzlərinin yaradılması, formalaşması və geniş ictimaiyyət tərəfindən mənimsənilməsi ümummilli lider Heydər Əliyevin gərgin əməyi və məqsədyönlü fəaliyyəti nəticəsində mümkün olub. Həmçinin bildirilib ki, ölkə rəhbərimiz, Ali Baş Komandan İlham Əliyevin məqsədyönlü siyasəti nəticəsində milli bayrağımız tezliklə işğal altında olan doğma yurdumuzda, Qarabağda dalğalanacaq.
Bayram tədbirində Masallı Mədəniyyət Mərkəzinin solistləri Miriş Hüseynovun, Məlahət Əzizlinin, Şamo İbayevin, “Masallı” rəqs qrupunun, Masallı Dövlət Regional Kollecinin tələbələrinin və “Viləş” uşaq bağçasının fidanlarının çıxışları maraqla qarşılanıb. 



Ə.ŞÜKÜROV,
A.AĞAYEV,
E.Əliyev (foto),
“Yeni həyat”,
www.yeniheyet.azшаблоны для dle 11.2