Rayon rəhbəri Kolatan-Qodman sərhədində asfaltlanan yola baxış keçirib
Masallı Rayon İcra Hakimiyyətinin başçısı Araz Əhmədov və aparatın Ərazi-təşkilat və ictimai-siyasi məsələlər şöbəsi müdirinin müavini, Müharibə iştirakçıları və şəhid ailələri ilə işin təşkili sektorunun müdiri Qəşəm Hadıyev Kolatan-Qodman sərhədində asfaltlanaraq istifadəyə verilmiş yola baxış keçirib.Rayon rəhbərinə ərazidə görülən işlər və yolun asfaltlanması ilə bağlı həyata keçirilən tədbirlər barədə məlumat verilib. Bildirilib ki, uzun müddət təmirə ehtiyacı olan yolun asfaltlanması ərazidə yaşayan sakinlərin rahat və təhlükəsiz hərəkətinin təmin olunması baxımından mühüm addımdır.
Baxış zamanı qeyd olunub ki, sözügedən yol rayonun bir sıra yaşayış məntəqələri arasında əlaqənin təmin olunmasında mühüm rol oynayır. Yolun əvvəlki vəziyyəti xüsusilə əlverişsiz hava şəraitində nəqliyyat vasitələrinin və piyadaların hərəkətində müəyyən çətinliklər yaradırdı. Aparılan asfaltlanma işlərindən sonra həmin çətinliklərin aradan qaldırılması, yolun hərəkət üçün daha əlverişli vəziyyətə gətirilməsi təmin olunub.
İcra başçısı ərazidə yaşayan sakinlərlə görüşərək onların fikirlərini dinləyib, yolun asfaltlanmasının əhali üçün yaratdığı imkanlarla maraqlanıb. Sakinlər görülən işdən razılıqlarını ifadə edərək yolun yenilənməsinin gündəlik gediş-gəlişin asanlaşmasına, yaşayış məntəqələri arasında əlaqənin yaxşılaşmasına və nəqliyyat vasitələrinin rahat hərəkətinə şərait yaratdığını bildiriblər.
Görüş zamanı sakinlərin digər məsələlərlə bağlı müraciətləri və təklifləri də dinlənilib. Rayon rəhbəri səsləndirilən məsələlərin aidiyyəti üzrə nəzərdən keçirilməsi və imkanlar daxilində həlli istiqamətində müvafiq tapşırıqlar verib.Qeyd olunub ki, rayon ərazisində yol-nəqliyyat infrastrukturunun yaxşılaşdırılması, yaşayış məntəqələrini birləşdirən yolların təmiri və asfaltlanması, eləcə də sakinlərin rahat və təhlükəsiz hərəkətinin təmin edilməsi istiqamətində işlər bundan sonra da davam etdiriləcək.
Kolatan-Qodman sərhədində yolun asfaltlanması ərazidə yaşayan sakinlərin gündəlik həyatına müsbət təsir göstərməklə yanaşı, rayonun yaşayış məntəqələri arasında nəqliyyat əlaqələrinin daha da yaxşılaşdırılmasına xidmət edir.
