Masallı Rayon İcra Hakimiyyətində “Şəhidlər unudulmur” mövzusunda tədbir keçirilib
24 sentyabr 2026-cı il tarixdə Masallı Rayon İcra Hakimiyyətində 27 Sentyabr – Anım Günü ilə əlaqədar “Şəhidlər unudulmur” mövzusunda tədbir keçirilib.
Prezident-Xalq-Ordu birliyi, Vətən müharibəsində qazanılmış tarixi Zəfər və vətənpərvərlik konsepsiyasına uyğun təşkil olunan tədbirin əsas məqsədi Vətən uğrunda canından keçmiş şəhidlərin əziz xatirəsini yad etmək, onların qəhrəmanlıq və fədakarlıq nümunəsini gənc nəslə çatdırmaq, milli birlik və vətənpərvərlik dəyərlərini təbliğ etmək olub.
Tədbiri giriş sözü ilə Masallı Rayon İcra Hakimiyyəti başçısı aparatının Ərazi-təşkilat və ictimai-siyasi məsələlər şöbəsi müdirinin müavini, Ərazi-təşkilat məsələləri sektorunun müdiri Nahid Həsənov açıb.
Nahid Həsənov çıxışında 27 Sentyabr – Anım Gününün xalqımızın yaddaşında xüsusi əhəmiyyət daşıdığını bildirib. Qeyd edib ki, Vətən müharibəsində Azərbaycan Ordusunun göstərdiyi misilsiz şücaət, hərbi qulluqçularımızın qəhrəmanlığı və şəhidlərimizin canı bahasına əldə edilən tarixi Zəfər Azərbaycanın ərazi bütövlüyünün və suverenliyinin təmin olunması ilə nəticələnib.
Bildirilib ki, Vətən müharibəsi Azərbaycan xalqının dövlətçilik iradəsini, milli həmrəyliyini və Prezident-Xalq-Ordu birliyini bütün dünyaya nümayiş etdirib. Xalqımızın Vətən sevgisi, Ordumuza göstərdiyi mənəvi dəstək və dövlət ətrafında sıx birliyi Qələbəyə aparan mühüm amillərdən olub.
Tədbirdə Masallı Rayon İcra Hakimiyyəti başçısı aparatının Ərazi-təşkilat məsələləri sektorunun baş məsləhətçisi Zahid Sadıxov və böyük məsləhətçisi Sənan Sadıqov çıxış ediblər.
Çıxışlarda ölkəmizdə vətənpərvərlik ideologiyasının təbliği, milli-mənəvi dəyərlərin qorunması, gənc nəslin Vətənə və dövlətə sədaqət ruhunda tərbiyə olunmasının əhəmiyyəti diqqətə çatdırılıb. Həmçinin xalqımızın Prezidentin ətrafında sıx birləşməsinin, dövlət və xalq birliyinin, Azərbaycan Ordusuna olan inam və dəstəyin tarixi Zəfərin əldə olunmasında mühüm rol oynadığı vurğulanıb.
Qeyd olunub ki, şəhidlərimizin həyat yolu və Vətən uğrunda göstərdikləri qəhrəmanlıq hər bir Azərbaycan vətəndaşı, xüsusilə gənc nəsil üçün əsl vətənpərvərlik nümunəsidir. Onların əziz xatirəsinin yaşadılması, keçdikləri şərəfli döyüş yolunun gələcək nəsillərə çatdırılması hər birimizin mənəvi borcudur.
Tədbirdə vurğulanıb ki, 27 Sentyabr – Anım Günü şəhidlərimizin qarşısında ehtiramımızı ifadə etməklə yanaşı, Vətən uğrunda canından keçən qəhrəmanlarımızın müqəddəs amalını gələcək nəsillərə çatdırmaq baxımından mühüm əhəmiyyət daşıyır.
Sonda şəhidlərimizin əziz xatirəsinin xalqımızın yaddaşında daim yaşayacağı, onların Vətənə sədaqət və qəhrəmanlıq nümunəsinin gələcək nəsillər üçün əbədi örnək olacağı bildirilib.
