Tövsiyə
- 30-12-2023, 16:38
- Maraqlı
- 0
- 99
Masallıda “Ziyalılar evi” niyə yoxdur
Bu yaxınlarda yolum Lənkərana düşmüşdü. Xeyli vaxtdı bu şəhərdə olmurdum. Şəhər icra hakimiyyətinin qarşısındakı parkda bir dəstə Masallı ziyalısını görəndə maraq məni onlarla görüşməyə sövq etdi. Dedilər ki, hər həftənin şənbə günü şəhər “Ziyalılar evi”ndə maraqlı ədəbi-bədii görüşümüz olur. Hər kim yazdığı şeir və hekayəni oxuyur, sonra da seçim edib sayt və qəzetlərdə veririk.
Vaxtın azlığından onlardan tez ayrılmalı oldum. Ancaq bu qısa görüşü unuda bilmədim. Öz-özümə sual verdim: Bəs bizim rayonda bir görüş yeri yoxdur? Masallının da özünə məxsus yazarları, şairləri var.
Bir vaxtlar rayonda tanınmış ziyalı-yazarları Arif Fərzəli, Xanəli Toliş, Qəni Bəxtəvər, Aslan Əsədov, Rəsul Müzəffəroğlu, Əhməd Səmədov, Həsən Əhədov, Aydın Əliquliyev, Əvəz Nəbioğlu, Xudakərim Məftun və onlarca başqalarını göstərmək olar.
Bu gün də Masallıda şair və yazar fəal ziyalı az deyil. Amma bir anlıq fikirləşirsən ki, Masallı ədəbi mühiti yox dərəcəsindədir. Əslində isə bu mühiti yaratmaq, populyarlaşdırmaq əlçatmaz deyil. Sadəcə bununçün bir neçə təşəbbüskar və onların yığışması üçün bir məkan seçmək gərəkdir.
Qəzetimiz ötən illərdə redaksiyamızın da yerləşdiyi şəhər ərazi nümayəndəliyi binasının qarşısındakı bir vaxtlar rayon polis şöbəsinə məxsus ikimərtəbəli, yaraşıqlı bir tikilinin boş qalmasını, buradan nə üçünsə istifadə edilə biləcəyini vurğulamışdı. Hətta binanın “Ziyalılar evi” kimi istifadəsini də tövsiyə etmişdi.
Həmin binaya diqqət edin:
İkimərtəbəli bina aqlay daşları ilə bəzədilmişdir. Birinci mərtəbədə geniş salon var ki, burada hər cür tədbir keçirmək mümkündür.
Binanın qarşısında 5-6 metr dərinlikdə hovuzun üstündə istirahət etmək üçün kölgəlik də salınmışdır.
Yaxınlığında geniş köşk yayda istirahət etmək üçün hazırlanmışdır.
Bəs binanın hazırki vəziyyəti nə deyir?
Qarşısındakı kubik daşlar, çör-çöp, səliqəsizlik buranı lap xarabazarlığa döndərib. İçərisində isə kommunal təsərrüfatı idarəsinin süpürgə, lapatka, verdə və nə bilim daha nələri.
Yazıb göstərmək bizdən, tədbir görmək əlaqədar təşkilatlardan. Görək də...
HƏSƏNAĞA.
"Yeni həyat" qəzeti,
www.yeniheyet.az
