Qəhrəmanların ömür yolu əbədidir
- 11-03-2024, 12:40
- Maraqlı
- 0
- 316
Masallıda Musaküçə kənd tam orta məktəbi şəhid Fayəddin Xancanovun adını daşıyır. 22 yanvar 1978-ci ildə Masallıda dünyaya göz açan elin bu qəhrəman oğlu Birinci Qarabağ müharibəsində sinəsini Ana Vətənə sipər edib mərdliklə düşmənə layiqli cavab verməklə 18 yaşında şəhidlik zirvəsinə ucalıb. Ömür yolu qısa olsa da, şərəfli ölümü ona əbədiyaşarlıq gətirib. Qəlblərdə yaşayır, xatırlanır.
Vətən sevdalısı Fayəddin Xancanov 1991-ci ilin aprel ayında ordu sıralarına yollanıb. Mingəçevir şəhərindəki "N" saylı hərbi hissədə təlim-məşqlərdə iştirak edib, Ağdərə bölgəsinin müdafiəsi uğrunda döyüşüb. Cəsarəti, qorxmazlığı, vətənpərvərliyi, sədaqəti ona hörmət qazandırıb. İgid əsgər 1993-cü il iyulun 23-də savaşda başından aldığı yaradan əbədiyyətə qovuşub.
Masallı Tarix-Diyarşünaslıq Muzeyinin təşkilatçılığı, eləcə Masallı Təhsil Sektorunun dəstəyi sayəsində "Qəhrəmanlarımızı tanıyaq" layihəsi çərçivəsində növbəti tədbir məhz şəhid Fayəddin Xancanov adına Musaküçə kənd tam orta məktəbində baş tutdu. Birinci Qarabağ və Vətən müharibəsi qəhrəmanlarının yeni nəsillərə tanıdılması məqsədini daşıyan tədbirdə müharibə iştirakçıları, müəllim və şagirdlər iştirak edirdilər.
Tədbirdə müharibənin ağır və tarixi məqamlarından söhbət açan muzeyin direktoru Əntiqə Tağıyeva onu da bildirdi ki, İkinci Qarabağ müharibəsi Azərbaycanın, həmçinin dünyanın hərb tarixinə qızıl hərflərlə yazılıb. Qəhrəman Azərbaycan övladları öz qanı bahasına 30 il düşmən əsarətində qalan Vətən torpaqlarını azad etməklə xalqımızın mənliyini, kimliyini qaytarmış oldular.
Qarabağ Müharibəsi Əlilləri, Veteranları və Şəhid Ailələri İctimai Birliyin Masallı rayon filialının sədri Nahid Rəhimov, Vətən müharibəsi iştirakçısı Bəhruz Mehbaliyev, Əli Namiq oğlu, Orxan Teymurov, Elşən Teyyub oğlu və Talib Qəzənfərli çıxışlarında tədbir iştirakçılarına keçdikləri döyüş yolundan danışdılar.
Yekunda məktəbin direktoru Aytən Əliyeva və müəllim, şəhid qardaşı Rizvan Rzayev yeniyetmələrin maarifləndirilməsi məqsədilə keçirilən bu səpkili tədbirlərin təşkilatçılarına minnətdarlıq etdilər.
Zəfər ORUCOĞLU
"Yeni həyat" qəzeti,
www.yeniheyet.az
