Bələdiyyə sədri ilə müsahibə
- 8-10-2024, 14:25
- Maraqlı
- 0
- 214
Görüləsi işimiz çoxdur
Müsahibimiz Yeddioymaq bələdiyyəsinin sədri Zeynalabidin Zeynalovdur.
Zeynalov Zeynalabidin Hüseyn oğlu 1961-ci il yanvarın 14-də Yeddioymaqda dünyaya göz açıb. Orta təhsilini də bu kənddəki məktəbdə alıb. 1987-ci ildə Azərbaycan Politexnik İnstitutunu bitirib, bir müddət rayondakı avtonəqliyyat müəssisəsində çalışıb. 2002-ci ildən Yeddioymaq bələdiyyəsinin sədridir. Yeni Azərbaycan Partiyasının üzvüdür.
-Zeynalabidin müəllim, bir bələdiyyə sədri kimi bu özünüidarəetmə qurumunun vəzifələrindən danışardınız.
-Ötən əsrin 90-cı illərinə kimi hər kəndin abadlığını, problemlərini dövlət həll edərdi. Müstəqillik əldə ediləndən sonra ərazi nümayəndələri kəndi idarə edirdilər. İllər keçdikcə kəndlərimiz bir çox çətinliklərlə üzləşdi. Kəndin inkişafı, sakinlərin dolanışığını, maddi vəziyyətini yaxşılaşdırmaq, abadlıq, səliqə-sahman işlərinə düzgün nəzarət etmək, vacib layihələr hazırlamaq üçün özünüidarəetmə qurumunun yaradılması tələb olunurdu. Eyni zamanda kənd təsərrüfatının inkişafı üçün qüvvələri birləşdirmək, fermerləri mövcud texnika ilə təchiz etmək üçün kömək göstərmək vacib idi. Bütün bunlar isə məhz bələdiyyə kimi bir quruma tapşırılmışdı. O vaxtdan 25 ildən çox bir müddət keçir. Bu illər ərzində bələdiyyə vəziyyətə tamlıq gətirə bilməsə də fəaliyyətində nəzərəçarpacaq dərəcədə irəliləyişə nail olub.
-Məhz sizin bələdiyyədə bu sahədə hansı tədbirlər həyata keçirilib?
-Bu sahədə uğurlu işimiz var. Bələdiyyə sədri seçildiyim ilk gündən kəndin təsərrüfat problemlərini aradan qaldırmağa çalışdım. Kəndin bazarla əlaqəsi kəsilmişdi. Pay torpaqlarda ancaq taxıl əkilirdi. Bu da kəndlinin toyuq dəninə bəs edirdi. Fermerlərlə əlaqəni möhkəmləndirdik. Bələdiyyə üzvlərinin hər birinə təsərrüfatın bir sahəsini nəzarətə almaq tapşırıldı. Texnikaların sazlığına nail olduq. Çünki texnikasız əkin-biçin yoxdur. Əkin-biçin də olmasa adamların dolanışığı çətindir. Təsərrüfatda yeni əkin sahələri yaratdıq. Pomidor, kələm, badımcan, bibər əkinlərini artırmaqla həm bolluq yaratdıq, həm də sakinlərin maddi vəziyyətini yaxşılaşdırdıq. Üstəlik kənddə xeyli iş yeri yarandı. İllər keçdikcə kəndin bazarla əlaqəsi möhkəmləndi. Hazırda bu əkinlərə daha çox önəm veririk.
-Kəndin abadlığı, səliqə-sahmanı sahəsində az işlər görülməyib.
-Əlbəttə, bu, bələdiyyənin ən vacib, ən dəyərli işidir. Müasir dövrdə ən mühüm məsələ abadlıqdır. Fəaliyyətimizin əsas qayəsidir abadlıq. Deyirlər abad kənd görüntüsündən bəlli olar. Hələ ötən illəri demirəm, 2024-cü ildə əsas diqqəti yaşıllığa, yolların təmirinə yönəltmişik. Ərazidə 4-5 kilometrlik yola qırma daş tökülüb, nahamar yollar doldurulub, hamarlanıb. Qasımlı kənd yoluna bir neçə maşın qırma daş yayılıb. Yeddioymaq kənd qəbiristanlığının qarşısı çox bərbad halda idi. Burada maşınların hərəkəti demək olar ki, mümkünsüz idi. Odur ki, həmin yerə 5 maşın daş-çınqıl töküb hamarladıq. Ərazidə başqa narahat yollar da hamarlanıb, çınqılla təmir olunub. Ərazinin bir çox küçələrində, nümayəndəliyin və başqa inzibati binaların həyətlərində xeyli gül kolu, bəzək ağacları əkmişik. Yaşıllıqların suvarılmasına, mühafizəsinə də diqqət yetirilir.
-Ərazidə həyata keçirilən tədbirlərdə kənd xeyriyyəçiləri, ziyalıların köməyi sizi qane edirmi?
-Bu işdə onlar ən yaxın dostlarımızdır. Yolların abadlaşdırılmasında, başqa xeyriyyə əməllərində onların əməyi çoxdur. Bu il Qasımlı məktəbinə 2 maşın odun vermişik. Yeni dərs ili ərəfəsində Qasımlı məktəbinin təmirinə kömək göstərmişik. İmkansız uşaqlara 100 manatlıq dərs ləvazımatı alınıb. Müraciətinə əsasən bir nəfər Qasımlı kənd sakininə 100 manat kömək etmişik. Diabetli xəstələrə yardım göstərilib. Xeyriyyəçilikdə ağsaqqal və ziyalılarımız fəallıq göstərirlər. Bu işdə İbrahim Şükürov, Saleh Salayev, Əşrəf Zeynalov, Akif Qarayev və başqaları həmişə əldən tuturlar. Kənddə erkən nikahlara, qanunsuz tikililərə qarşı mübarizədə də onların nüfuz və köməyindən yararlanırıq.
-Həyata keçirilən tədbirlərdə ərazi nümayəndəliyi ilə birliyiniz.
-Bu mütləqdir. Birlik olan yerdə dirilik, xeyir-bərəkət, böyük-kiçiklik, hörmət-izzət olar, deyirlər. Şəhid ailələrinə göstərilən qayğılar zamanı məsləhətləşmələrimiz çox olur. Ərazi nümayəndəliyi ilə birlikdə şəhid ailələrinə baş çəkir, gənclərin ordu sıralarına yola salınmasına birlikdə kömək göstəririk. Vətəndaşların ərizə və şikayətlərini hər iki qurum birlikdə həll edir.
Həyat dəyişir, qloballaşan dünyada daim yeniliklərlə ayaqlaşmaq, kəndin inkişafına, adamların rifah halının yaxşılaşdırılmasına diqqəti daha da artırmalıyıq. Deməli, qarşıda hələ görüləsi iş çoxdur.
-Müsahibəyə görə sağ olun.
-Siz də sağ olun.
Müsahibəni apardı:
Həsənağa ƏLİYEV.
