Masallıda “Tarixi-dini abidələrlə zəngin Füzulimiz sənə qayıtdıq” mövzusunda tədbir

18-10-2024, 15:48
Maraqlı

Masallı rayon İcra Hakimiyyəti, Lənkəran -Astara Regional Mədəniyyət İdarəsi, Masallı rayon Heydər Əliyev Mərkəzi, Masallı Tarix-Diyarşünaslıq Muzeyi, Masallı Mərkəzi Kitabxana Sektoru və Masallı Dövlət Regional Kollecinin birgə təşkilatçılığı ilə “Tarixi-dini abidələrlə zəngin Füzulimiz sənə qayıtdıq” mövzusunda tədbir keçirildi.

Masallı Dövlət Kollecində “Füzuli Şəhəri günü” ilə əlaqədar keçirilən tədbirdə təşkilatçı müəssisənin nümayəndələri, Qarabağ müharibəsi iştirakçıları, veteranlar, qazilər, mədəniyyət işçiləri, kollecin müəllim və tələbələri iştirak etdilər.

Ilk öncə şəhidlərin əziz xatirəsi böyük ehtiramla yad edildi.

Tədbirdə çıxış edənlər 5 yanvar 1994-cü ildə Ulu Öndər Heydər Əliyevin əmri ilə Azərbaycan Respublikası Silahlı Qüvvələrinin hücumu nəticəsində ilk qazanılan qələbədə 22 yaşayış məntəqəsi işğaldan azad olunmuş Füzulinin 27 il sonra Ermənistanın təxribatlarına cavab olaraq Prezident, Müzəffər Ali Baş Komandan İlham Əliyevin komandanlığı ilə 2020-ci il 27 sentyabr tarixində başlayan Vətən müharibəsinin 21-ci günündə Füzuli şəhəri və 62 yaşayış məntəqəsinin işğaldan azad edilməsindən geniş danışmış oldular.

Onlar qeyd etdilər ki, Füzuli əməliyyatı Azərbaycanın İkinci Qarabağ döyüşlərində cənub-şərq cəbhəsində baş vermiş ən əhəmiyyətli döyüşlərdən biridir. Erməni hərbi birləşmələrinin təxribatı nəticəsində Füzuli ərazisində mülki əhaliyə, dövlət əmlakına, infrastruktur obyektlərinə, habelə sahibkarlıq subyektlərinə vurduqları ziyan, bu ərazilərin azad edilmiş rayonlar arasında minaların sayına görə ən çox çirkləndirilmiş rayon olması barədə qeydlər edən nümayəndələr qürur və iftixarımız olan Zəfər tarixi sayəsində Qarabağın hava qapısı adlandırılan Füzulinin yenidən qurulub, dirçəlib, yeni həyata qayıtmasından da danışdılar.

Yekunda Füzuli döyüşlərində iştirak edən bir qrup veteran və qazi göstərdikləri igidliklərə görə təşkilatçılar tərəfindən Fəxri Fərmanla təltif olundular.