Somali Federativ Respublikasının Prezidenti Azərbaycana rəsmi səfərdə olmuşdur
- 16-02-2025, 22:30
- Maraqlı
- 0
- 164
Azərbaycan Respublikasının Prezidenti İlham Əliyevin cari ilin fevralın 12-də Somali Federativ Respublikasının Prezidenti Hasan Şeyx Mahmudun Azərbaycana rəsmi səfəri ilə bağlı mətbuata bəyanat verib.Bəyanatda Cənab Prezident qeyd edib ki, əminəm ki, hazırda Bakıda imzalanmış bütün razılaşmalar həyata keçiriləcək və münasibətlərimizi daha yüksək səviyyəyə qaldıracaq. Regionlarımızda geosiyasi vəziyyəti, ölkələrimizin üzləşdiyi çağırışları geniş şəkildə müzakirə etdik, ölkələrimizin ərazi bütövlüyünə və suverenliyinə qarşılıqlı dəstəyimizi, eləcə də terrorçuluğa və ekstremizmə qarşı mübarizədə ortaq mövqeyimizi bir daha vurğuladıq.
Əlbəttə, hər bir ölkə üçün siyasi sabitlik inkişafı təmin edən ilkin şərtdir. 1990-cı illərdən və bu əsrin əvvəlindən tutmuş beynəlxalq səviyyədə tanınmış ərazilərimizin erməni işğalından azad edilməsinə qədər Azərbaycanın üzləşdiyi ağır dövr barədə cənab Prezidentə məlumat verdim. Prezident qeyd edib ki, həmçinin Somali Federativ Respublikasının Prezidenti Hasan Şeyx Mahmudla Somalidə sərmayə imkanlarını müzakirə etdik.
Prezident qeyd edib: “Bildiyiniz kimi, cənab Prezidentin səfərindən əvvəl Azərbaycanın böyük nümayəndə heyəti bir həftə öncə Somaliyə səfər etmiş, əsasən, səfərin hazırlanması və eyni zamanda, gələcəkdə güclü iqtisadi, siyasi və mədəni əlaqələrin qurulması üzərində çalışmışdır. Düşünürəm ki, həmin proses davam etməlidir. Düşünürəm ki, Prezidentin rəsmi səfəri nəticəsində digər heyəti konkret hədəf və məqsədlərlə sərmayə sahələrini müəyyən etmək, eləcə də Azərbaycanın sərmayələri qəbul oluna biləcək və faydalı olacaq konkret layihələri qeyd etmək üçün Somaliyə ezam etməliyik.
Məsələn, bu sahələr infrastruktur, liman qurğuları və kənd təsərrüfatı ola bilər. Cənab Prezident kənd təsərrüfatında böyük potensialın olduğu barədə məlumat verdi. Mən, həmçinin Azərbaycanda özünü təmin edən kənd təsərrüfatının yaradılması ilə əlaqədar hədəflərimiz barədə məlumat verdim. Bir sözlə, hesab edirəm ki, bu sahədə kifayət qədər nəzərəçarpan əməkdaşlıq qura bilərik”.
2023-cü ilin iyul ayında Somalinin xarici işlər və beynəlxalq əməkdaşlıq naziri Qoşulmama Hərəkatının Koordinasiya Bürosunun Bakıda keçirilən nazirlər iclasında iştirak etmişdir. Bu tədbir ölkəmizin beynəlxalq münasibətlərdəki əhəmiyyətini və Qoşulmama Hərəkatı çərçivəsindəki rolunu bir daha önə çıxardı. Əvvəlki xarici işlər naziri Bakıda keçirilən iclasda iştirakı iki ölkə arasında dostluq münasibətlərinin və strateji əməkdaşlığın daha da güclənməsinə zəmin yaratdı. Ötən ilin iyulunda isə Somalinin xarici işlər və beynəlxalq əməkdaşlıq naziri Əhməd Moallim Fiqinin başçılıq etdiyi nümayəndə heyəti Azərbaycanda rəsmi səfərdə olub. Səfər zamanı ikitərəfli məsələlər üzrə müzakirələr aparılıb, gələcəkdəki əməkdaşlıq imkanlarını genişləndirmək üçün bir çox sahədə konkret addımlar atılmasına qərar verilib.
İmzalanan sənədlər və həyata keçirilən mübadilə iki ölkə arasında əməkdaşlığı daha da dərinləşdirir. Somali Azərbaycanın inkişaf təcrübəsindən faydalanaraq iqtisadiyyatını gücləndirə bilər. Eyni zamanda bu əməkdaşlıq regional təhlükəsizliyin təmin olunması və qarşılıqlı faydalı layihələrin həyata keçirilməsi baxımından strateji əhəmiyyət kəsb edir.
Ceyhun Hüseynov,
Masallı RMX İƏ üzrə mütəxəssis
