Azərbaycan Respublikası Prezidenti İlham Əliyevin İtaliya Respublikasının Prezidenti Sercio Mattarella ilə görüşdən sonra mətbuata bəyanatı
- 3-10-2025, 14:54
- Maraqlı
- 0
- 111
Azərbaycan Respublikası Prezidenti İlham Əliyevin İtaliya Respublikasının Prezidenti Sercio Mattarella ilə görüşdən sonra mətbuata bəyanatı
(30 sentyabr 2025, Bakı şəhəri)
Prezident İlham Əliyev çıxışına İtaliya dövlət başçısını səmimi şəkildə salamlayaraq başladı və onun Azərbaycana ikinci rəsmi səfərinin xüsusi əhəmiyyət daşıdığını qeyd etdi. Dövlət başçısı vurğuladı ki, bu səfər ölkələrimiz arasında dostluq və strateji tərəfdaşlıq münasibətlərinin daha da inkişafına mühüm töhfə verəcəkdir.
Azərbaycan–İtaliya əlaqələrinin əsasını strateji tərəfdaşlıq təşkil edir. İmzalanmış mühüm sənədlər – 2015-ci ildə qəbul olunmuş strateji tərəfdaşlıq bəyannaməsi və 2020-ci ildə imzalanmış Hərtərəfli Strateji Tərəfdaşlıq haqqında Bəyannamə iki ölkə münasibətlərinin dərin və çoxşaxəli xarakterini təsdiq edir. Prezident İlham Əliyev qeyd etdi ki, bu sənədlər kağız üzərində qalmamış, praktiki fəaliyyətlərdə də öz təsdiqini tapmışdır.
Siyasi dialoqun yüksək səviyyədə aparıldığını bildirən dövlət başçısı, İtaliya ilə müntəzəm görüşlərin keçirildiyini, beynəlxalq təşkilatlar çərçivəsində sıx əməkdaşlığın mövcud olduğunu vurğuladı. İlham Əliyev Avropa İttifaqı ilə əlaqələrin inkişafında İtaliyanın fəal dəstəyini xüsusi minnətdarlıqla qeyd etdi.
İqtisadi və enerji əməkdaşlığı iki ölkə münasibətlərinin əsas dayaqlarından biri kimi göstərildi. Prezident İlham Əliyev bəyan etdi ki, İtaliya Azərbaycanın əsas ticarət tərəfdaşıdır və ticarət dövriyyəsi ildən-ilə artır. Energetika sahəsində həyata keçirilən layihələr, xüsusən Cənub Qaz Dəhlizi və TAP layihəsi bu əməkdaşlığın nümunələridir. Azərbaycan qazının və neftinin İtaliyaya və Avropanın digər ölkələrinə çatdırılması qlobal enerji təhlükəsizliyinə də mühüm töhfə verir. Prezident əlavə etdi ki, energetika sahəsində yeni mərhələ yaşıl enerji və elektrik ixracı olacaq, bu istiqamətdə artıq konkret addımlar atılır.
Humanitar sahədə əməkdaşlığın genişlənməsi də xüsusi vurğulandı. Prezident İlham Əliyev əvvəlki səfər zamanı Sumqayıtda İtaliya şirkətinin iştirakı ilə açılmış sənaye obyektinə istinad edərək, bu dəfə Bakıda İtaliya–Azərbaycan Universitetinin fəaliyyətə başlamasının tarixi hadisə olduğunu bildirdi. Bu universitetin gələcəkdə iki ölkə arasında dostluğun və tərəfdaşlığın möhkəmlənməsinə xidmət edəcəyi, burada təhsil alan gənclərin isə münasibətlərin elçilərinə çevriləcəyi qeyd olundu.
Çıxışının yekununda Prezident İlham Əliyev İtaliya ilə əlaqələrin strateji tərəfdaşlıq səviyyəsində inkişafından məmnunluğunu ifadə etdi. O, səfərin ölkələrimiz arasındakı münasibətlərin daha da güclənməsinə yol açacağına inamını bildirdi, İtaliya Prezidentinə səmimi salamlarını və təşəkkürünü çatdırdı.
Azər Nəsirov,
Masallı rayonu
