Azad Zəngilanda abadlıq-quruculuq işləri sürətlə davam etdirilir

 

Zəngilan rayonu - Şərqi Zəngəzur iqtisadi rayonuna daxil olub, Araz çayı boyunca, Kiçik Qafqaz dağlarının cənub-şərqində yerləşən tarixi Azərbaycan rayonu. Rayon 1993-cü il oktyabrın 30-da Ermənistan tərəfindən işğal edilmişdi. 27 il düşmən tapdağında qalan rayondan demək olar ki, əsər-əlamət qalmamışdı. Tarixi abidələr dağıdılmış, təbiətə divan tutulmuşdu. Rayon ərazisində yerləşən Avropanın ən böyük çinar meşəsi də yağı düşmən tərəfindən məhv edilmişdir.

İşğalla barışmayan Azərbaycan xalqı böyük səbrsizliklə torpaqlarını işğaldan azad etmək üçün öz Ali Baş Komandanından “döyüşə” əmrini gözləyirdi. Çünki onlar yaxşı bilirdi ki, Ermənistan və onun havadarları, xalqımıza və dövlətimizə qarşı daima məkrli və qərəzli siyasət yeridən beynəlxalq təşkilatlar heç vaxt o torpaqları sülhlə qaytarmayacaq. Nəhayət o gün gəldi, 2020-ci ilin 27 sentyabrında işğala son qoymaq üçün əks hücum əməliyyatı başladı. Azərbaycan Respublikası Silahlı Qüvvələrinin Ali Baş Komandanı cənab İlham Əliyevin rəhbərliyi ordumuz döyüşün ilk saatlarında, o zamankı “təmas xətti”ndə yaradılmış istehkamları aşaraq öz tarixi torpaqlarını işğaldan azad etməyə başladı. Xalq öz liderinin ətrafında sıx birləşərək dəmir yumruq yaratdı. Günlər ötdükcə torpaqlarımız bir-bir azad edilir, hər gün ölkə başçısı xalqımıza müjdəli xəbərlər verirdi. Təqvimdə 20 oktyabr 2020-ci il. Ölkə başçısı cənab İlham Əliyev ənənəyə sadiq qalaraq xalqa növbəti müraciətini edir, azad olunan yaşayış məntəqələrinin adlarını sadalayır və əlindəki kağızı qatlayıb kənara qoyaraq: “və” deyir. Ekran qarşısında cənab Prezidenti səbrsizliklə dinləyən milyonlar bir anlıq nəfəsini tutur. Cənab Prezident davam edir “Zəngilan şəhəri”. Xalqın sevincinin həddi-hüdudu yoxdur, sevinc göz yaşları içində alqışlar ...

Böyük strateji əhəmiyyətə malik Zəngilan rayonunun düşməndən azad olunması xəbəri bu ərazilərdən köçkün düşmüş insanların ağrı-acılarına ən yaxşı məlhəm oldu. Uzun illər torpaqlarımızı əllərində saxlamış erməni vandalları Vətənimizin bu gözəl diyarındakı tarixi abidələri də yerlə yeksan etmiş, məzarlıqları vəhşicəsinə dağıtmış, qəbirləri təhqir etmişdilər. Zəngilan rayonu uğrunda gedən döyüşlərdə şəhid olmuş Xudayar Yusifzadənin oxuduğu "Vətən yaxşıdır" mahnısı həmin günlərdə hamını kövrəldirdi. 

Artıq Zəngilan azad idi. 23 dekabr 2020-ci il Zəngilanın tarixinə qızıl hərflərlə yazıldı. Prezident İlham Əliyev həmin gün Zəngilanda Azərbaycan bayrağını ucaltdı. Dövlət başçısının 31 iyul 2023-cü il tarixli sərəncamına əsasən, şəhərin işğaldan azad edildiyi 20 oktyabr günü Zəngilan Şəhəri Günü kimi qeyd olunur. İşğaldan azad edilmiş ərazilərdə şəhər günlərinin təsis edilməsi Vətən müharibəsində qazanılmış qələbəni tarixiləşdirməyə, əbədiləşdirməyə xidmət edir. İndi bu günü Qələbə ovqatı ilə, Zəfər sevinci ilə, bu sevinci bizə bəxş edən şəhidlərə minnətdarlıq və ehtiram hissi ilə qeyd edirik. Nə qədər sevincli günlər yaşasaq da, erməni vandalizmini, erməni zülmünü, vəhşiliyini, barbarlığını heç vaxt unutmayacağıq.

44 günlük Vətən müharibəsi Zəfərlə başa çatdıqdan sonra Prezident İlham Əliyevin rəhbərliyi altında erməni işğalçılarından azad olunmuş ərazilərdə bərpa və yenidənqurma işlərinə başlanıldı. Düşmənlərdən təmizlənmiş ərazilərdə elə ilk olaraq Zəngilan rayonunun Ağalı kəndində "ağıllı kənd" layihəsi həyata keçirildi. Elə hal-hazırda da Zəngilanda aparılan abadlıq bərpa işləri sürətlə davam edir. Bütün bu işlər ölkəmizin iqtisadi gücünün isbatıdır. Bu işlərin keyfiyyətli və belə sürətli aparılmasında cənab Prezident İlham Əliyevin danılmaz xidmətləri vardır. Mütəmadi olaraq bu işlərə yerində baxış keçirir, lazımi tapşırıqları verir

İndi Zəngilana həyat qayıdıb, mərhələli şəkildə əhali öz yurdlarına köçürülür, abadlıq-quruculuq işləri sürətlə davam etdirilir.