Prezident İlham Əliyev: Azərbaycan və Slovakiya dost və strateji tərəfdaşlardır
- 10-12-2025, 13:03
- Maraqlı
- 0
- 131
Prezident İlham Əliyev çıxışında bildirib ki, Slovakiya və Azərbaycan sözün əsl mənasında dost ölkələr və strateji tərəfdaşlardır. Dövlət başçısı xatırladıb ki, ötən il iki ölkə arasında Strateji Tərəfdaşlıq haqqında Birgə Bəyannamə imzalanmış və bu sənəd münasibətləri ən yüksək səviyyəyə yüksəltmişdir. Prezidentin sözlərinə görə, həmin sənədin imzalanmasından sonra bütün istiqamətlər üzrə çox fəal əməkdaşlıq müşahidə olunur və hər sahədə birgə komandalar intensiv fəaliyyət göstərir. Birgə İqtisadi İşçi Qrupunun fəaliyyəti genişləndirilir, energetika sahəsində konkret layihələr icra edilir.
Prezident İlham Əliyev qeyd etmişdir ki, ötən il ilk dəfə olaraq Azərbaycan qazı Slovakiyaya ixrac edilmişdir və Azərbaycan Slovakiyanın ehtiyac duyduğu həcmdə enerji resurslarını təmin edə bilər. Dövlət başçısı bildirib ki, Azərbaycanın zəngin qaz yataqları ölkəmizə dünyanın geniş coğrafiyasına təbii qaz ixrac etməyə imkan verir. Hazırda Azərbaycan qazı alan ölkələrin sayı 14-ə çatıb və ölkəmiz boru kəmərləri vasitəsilə qaz ixracında birinci yerdədir. Yeni qaz yataqlarının işlənməsi əlavə resurs yaradacaq və həm Slovakiyaya, həm də region ölkələrinə qaz tədarükünü artırmaq mümkün olacaq. Ümumi qaz ixracının 25 milyard kubmetrə çatdığını, bunun yarısının Avropaya yönəldiyini vurğulayan Prezident bildirib ki, Avropa İttifaqına üzv 8 ölkə artıq Azərbaycan qazı hesabına enerji təhlükəsizliyini möhkəmləndirib.
Müdafiə sənayesi sahəsində əməkdaşlığa toxunan Prezident İlham Əliyev bu əməkdaşlığın hərbi niyyət daşımadığını, əsas məqsədin Slovakiya texnologiyaları ilə Azərbaycan maliyyə imkanlarını birləşdirərək yeni sənaye məhsulları istehsal etmək olduğunu bildirib. “Biz müharibə aparmaq fikrində deyilik, müharibələr artıq bizim üçün keçmişdə qalıb,” – deyən Prezident qeyd edib ki, bu sinergiya həm ölkələr üçün, həm də beynəlxalq bazar üçün yeni imkanlar yaradacaq. Hazırda bu istiqamətdə konkret layihələr hazırlanır.
Prezident xatırladıb ki, noyabrın 8-də Azərbaycanın Zəfər Gününün beşinci ildönümü qeyd olunub və bu mərasimdə Slovakiyanın Baş nazirinin müavini və müdafiə nazirinin iştirakı xüsusi məmnunluq doğurub. Dövlət başçısı Slovakiya hökumətinə göstərilən dostluğa görə təşəkkürünü bildirib və qeyd edib ki, bu addım ölkələr arasındakı münasibətlərin səmimiliyini təsdiqləyir.
Slovakiyanın inkişafı barədə danışan Prezident İlham Əliyev bildirib ki, ölkədə sabitlik və iqtisadi tərəqqi müşahidə edilir. O, Slovakiyanın güclü sənaye potensialı və müstəqil xarici siyasət yürütməsini xüsusi olaraq yüksək qiymətləndirib.
Qənbərova Gülcamal,
Qızılavar kəndi.
