Azərbaycanın beynəlxalq münasibətlərdəki mövqeyi və nüfuzu

 

Azərbaycanın uğurlu xarici siyasətinin nəticəsidir ki, bu gün aparıcı mövqeyə malik olan dünyanın nüfuzlu dövlətlərinin, eləcə də beynəlxalq və regional təşkilatların bir çoxu beynəlxalq münasibətlər sistemində respublikamızın tərəfdaşı kimi çıxış edir. Həmin qurumlar sırasında dünyanın siyasi və iqtisadi həyatında, habelə beynəlxalq münasibətlər sistemində xüsusi diqqət çəkən Şimali Makedoniya da mühüm yer tutur.

Respublikamız ilə Şimali Makedoniya arasında diplomatik əlaqələr 1995-ci ilin iyununda qurulub. Azərbaycan digər Balkan dövlətləri kimi Şimali Makedoniya ilə münasibətlərin inkişafına ciddi önəm verir. Eyni zamanda ölkələrimiz arasında əməkdaşlıq siyasi, iqtisadi və humanitar sahələrdə uğurla inkişaf edir. Azərbaycan – Şimali Makedoniya parlamentlərarası əlaqələr üzrə işçi qrupu fəaliyyət göstərir ki, bu da əməkdaşlığın dərinləşməsi üçün olduqca səmərəlidir.

        Azərbaycan Prezidenti İlham Əliyev və Şimali Makedoniya Prezidenti Qordana Silyanovska Davkova arasında keçirilən görüş, hər iki ölkənin iqtisadi, ticari, enerji və nəqliyyat sahəsində əməkdaşlığının inkişafında yeni mərhələnin başlanğıcını göstərir. Hər iki dövlətin  mövqeləri və regional maraqları nəzərə alındıqda, daha xüsusi bir əhəmiyyət kəsb edir. Prezidentlər İlham Əliyev və Qordana Silyanovska Davkovanın birgə bəyanatı, ikitərəfli münasibətlərin daha da möhkəmləndirilməsinə dair konkret addımların atılacağına dair əminlik verir. İki ölkə arasında iqtisadi, siyasi, enerji və mədəni sahələrdəki əməkdaşlıq, həm Cənubi Qafqaz, həm də Balkanlar bölgəsində daha geniş bir strateji əlaqənin qurulmasına zəmin yaradır. Bu əməkdaşlığın davamı, hər iki ölkənin inkişafını dəstəkləyərək, onların beynəlxalq arenada daha möhkəm mövqe tutmasına imkan verəcəkdir. 

              Prezident cənab İlham Əliyevin qeyd etdiyi kimi,” ikitərəfli münasibətlərin inkişafı üçün fəal iş aparılır və ölkələrimiz arasında siyasi dialoq dinamik xarakter alır.Son ayların müsbət əlaməti də ondan ibarətdir ki, iki ölkə energetika sahəsində əməkdaşlığa başlamışdır. Azərbaycan qazı artıq Şimali Makedoniyanın bazarına çatdırılmışdır və bu, keçən ilin sonlarında baş verdi, bu il artıq müntəzəm olaraq Azərbaycan sizin bazarınızı təbii qazla təmin edəcəkdir. Gələcəkdə biz lazım olan həcmdə qaz təchizatını artıra bilərik. Çünki biz bu gün yeni qaz yataqlarının istismara verilməsi istiqamətində fəal iş aparırıq. Bildirməliyəm ki, hazırda Azərbaycan 12 ölkəyə təbii qaz ixrac edir və bizim müştərilərimizin coğrafi yerləşməsi də Avrasiya məkanını əhatə edir.”

              Azərbaycanın zəngin enerji ehtiyatları, xüsusilə neft və qaz sahəsindəki təcrübəsi, Şimali Makedoniya ilə enerji təhlükəsizliyinin təmin edilməsi və energetika sahəsində əməkdaşlığın gücləndirilməsi baxımından çox  faydalıdır.Azərbaycanın beynəlxalq münasibətlərdəki mövqeyi və nüfuzu, Şimali Makedoniya üçün strateji əhəmiyyət daşıyır. Azərbaycanla olan əməkdaşlıq, Makedoniyanı daha güclü bir beynəlxalq faktor olaraq möhkəmləndirə bilər.