27 Sentyabr – Anım Günü: Şəhidlərimizin əziz xatirəsi daim yaşayacaq”
- Bu gün, 10:58
- Maraqlı
- 0
- 9
27 Sentyabr – Anım Günü Azərbaycan xalqının yaddaşında Vətən uğrunda canından keçmiş qəhrəman övladlarımızın əziz xatirəsinin ehtiramla yad edildiyi müqəddəs günlərdən biridir.
2020-ci il sentyabrın 27-də Azərbaycan Respublikasının Silahlı Qüvvələrinin həyata keçirdiyi əks-hücum əməliyyatları ilə başlayan Vətən müharibəsi xalqımızın tarixində mühüm və şərəfli səhifə açdı. 44 gün davam edən müharibə Azərbaycan Ordusunun yüksək döyüş hazırlığını, hərbi qüdrətini, əsgər və zabitlərimizin misilsiz qəhrəmanlığını nümayiş etdirdi.
Vətən müharibəsi Azərbaycanın ərazi bütövlüyünün bərpası istiqamətində tarixi əhəmiyyət daşıyan hadisə oldu. Müharibə zamanı Azərbaycan xalqı dövlət və ordu ətrafında sıx birləşərək milli həmrəyliyin ən parlaq nümunəsini nümayiş etdirdi.
Bu tarixi Qələbənin əldə olunmasında şəhidlərimizin əvəzsiz xidmətləri vardır. Onlar Vətən torpağının müdafiəsi uğrunda öz canlarından keçərək adlarını Azərbaycan tarixinin şərəf səhifələrinə əbədi yazdılar. Şəhidlərimizin qəhrəmanlığı xalqımızın yaddaşında daim yaşayacaq, onların müqəddəs xatirəsi gələcək nəsillərə örnək olacaq.
27 Sentyabr – Anım Günü həm də şəhid ailələrinə və Vətən müharibəsi iştirakçılarına ehtiramın ifadəsidir. Bu gün biz şəhidlərimizin keçdiyi şərəfli yolu xatırlayır, onların ailələrinin qarşısında dərin ehtiramımızı bildiririk.
Şəhidlərimizin həyat və döyüş yolu gənc nəslin vətənpərvərlik ruhunda tərbiyəsində mühüm əhəmiyyət daşıyır. Onların qəhrəmanlığı Vətənə bağlılığın, milli iradənin və fədakarlığın parlaq nümunəsidir.
27 Sentyabr – Anım Günü Azərbaycan xalqının şəhidlərə olan sonsuz ehtiramının, Vətən sevgisinin və milli yaddaşının ifadəsidir.
Həsənov İlkin,
Masallı rayon Musaküçə kənd sakini
