Milli həmrəyliyin və dövlət–xalq birliyinin ictimai-siyasi həyatımızdakı möhtəşəm təzahürü

Bu gün, 11:31
Maraqlı

Azərbaycanın ictimai-siyasi həyatında mühüm hadisələrdən biri olan Yeni Azərbaycan Partiyasının VIII Qurultayının keçirilməsi ölkəmizin siyasi tarixində əlamətdar hadisə kimi yadda qaldı. Qurultay yalnız təşkilati məsələlərin müzakirə olunduğu toplantı deyil, həm də Azərbaycanın gələcək inkişaf istiqamətlərinə dair mühüm mesajların səsləndirildiyi, milli həmrəyliyin və dövlət–xalq birliyinin bir daha nümayiş etdirildiyi mühüm siyasi platforma oldu.

Prezidentin çıxışında Azərbaycanın keçdiyi tarixi yol, əldə etdiyi böyük nailiyyətlər, ölkəmizin qarşısında duran yeni hədəflər və gələcək inkişaf perspektivləri öz əksini tapdı.

Bu Qurultayın əsas xüsusiyyətlərindən biri də Azərbaycan xalqının dövlətçilik ətrafında sıx birliyinin bir daha aydın şəkildə nümayiş etdirilməsi idi. Bu birlik təsadüfi deyil. Azərbaycanın müstəqilliyinin möhkəmləndirilməsi, ərazi bütövlüyümüzün və suverenliyimizin tam bərpası, ölkəmizin beynəlxalq nüfuzunun yüksəlməsi xalqımızın ümummilli maraqlar ətrafında birliyinin nəticəsidir.

Bu gün Azərbaycan yeni inkişaf mərhələsinə qədəm qoyub. Qarşıda daha böyük məqsədlər, yeni çağırışlar və mühüm vəzifələr dayanır. Belə bir mərhələdə siyasi sabitliyin, milli həmrəyliyin və dövlət–xalq birliyinin qorunması xüsusi əhəmiyyət daşıyır. VIII Qurultay da məhz bu birlik və həmrəyliyin gücünü nümayiş etdirdi.

Xüsusilə gənc nəslin dövlətçilik düşüncəsinin formalaşdırılması, milli-mənəvi dəyərlərə bağlılığının gücləndirilməsi və Azərbaycanın gələcəyinə inam ruhunda tərbiyə olunması hər birimizin üzərinə böyük məsuliyyət qoyur. Dövlətimizin qazandığı uğurların qorunması və daha da inkişaf etdirilməsi yalnız ümumi məqsəd və həmrəy fəaliyyət sayəsində mümkündür.

Bu gün biz qalib Azərbaycanın vətəndaşları olaraq yeni tarixi mərhələnin şahidiyik. Qarşımızda duran əsas vəzifə əldə olunmuş Zəfəri və milli həmrəyliyi qorumaq, dövlətimizin inkişafına öz əməyimizlə töhfə vermək və gələcək nəsillərə daha güclü Azərbaycan miras qoymaqdır.