Azərbaycan–Böyük Britaniya əlaqələri: qarşılıqlı etimad və ortaq maraqlar
- Bu gün, 19:56
- Maraqlı
- 0
- 6

Azərbaycan Respublikası ilə Böyük Britaniya və Şimali İrlandiya Birləşmiş Krallığı arasında 2026-cı il noyabrın 12-də Strateji Tərəfdaşlıq haqqında Birgə Bəyannamənin imzalanması iki ölkə arasındakı münasibətlərin inkişafında mühüm tarixi hadisədir.
Azərbaycan Respublikasının Prezidenti İlham Əliyev və Böyük Britaniyanın Baş naziri Endi Börnham tərəfindən imzalanan sənəd ikitərəfli əlaqələrin yeni, daha yüksək mərhələyə yüksəldilməsini nəzərdə tutur.
Bəyannamə müdafiə və təhlükəsizlik, ticarət və investisiya, iqtisadi inkişaf, təhsil və innovasiya kimi mühüm istiqamətləri əhatə edir. Sənəddə enerji təhlükəsizliyi, bərpaolunan enerji mənbələrinin inkişafı, Orta Dəhlizin genişləndirilməsi, nəqliyyat-logistika əlaqələrinin gücləndirilməsi və rəqəmsal transformasiya məsələlərinə xüsusi diqqət yetirilir.
Eyni zamanda, sənəddə Azərbaycanın suverenliyinə, müstəqilliyinə və ərazi bütövlüyünə hörmət, beynəlxalq hüququn norma və prinsiplərinə sadiqlik bir daha vurğulanır. Böyük Britaniyanın Azərbaycan və Ermənistan arasında davamlı sülhün əldə olunmasına yönəlmiş səylərə dəstəyi də Bəyannamədə öz əksini tapır.
Bu sənəd Azərbaycanın beynəlxalq tərəfdaşlıq əlaqələrinin genişləndirilməsi, iqtisadi potensialının artırılması və regional mövqelərinin möhkəmləndirilməsi baxımından mühüm əhəmiyyət daşıyır. Həmçinin iki ölkə arasında qarşılıqlı etimada, ortaq maraqlara və uzunmüddətli əməkdaşlığa əsaslanan münasibətlərin gələcək inkişafı üçün yeni imkanlar yaradır.
Aybəniz Novruzova,
Masallı RİHBA-nın İctimai-siyasi və humanitar sektorunun aparıcı məsləhətçisi




























