Rayon rəhbəri Sığdaş kəndində inşa olunan Ağsaqqallar evində aparılan işlərlə tanış olub
Rayon rəhbərinə görülən işlər barədə məlumat verilib. Bildirilib ki, kənddə ağsaqqalların asudə vaxtlarını səmərəli keçirmələri, bir araya gələrək ünsiyyət saxlamaları və müxtəlif məsələlər ətrafında fikir mübadiləsi aparmaları üçün müasir tələblərə uyğun şərait yaradılır.
Araz Əhmədov aparılan tikinti işlərinə baxış keçirib, görülən işlərin keyfiyyəti, yaradılan şərait və qarşıda duran məsələlərlə maraqlanıb. Rayon rəhbəri işlərin müəyyən olunmuş tələblərə uyğun və keyfiyyətlə həyata keçirilməsinin vacibliyini diqqətə çatdırıb.
Ağsaqqallar evinin yaradılması Sığdaş kənd sakinləri, xüsusilə yaşlı nəslin nümayəndələri tərəfindən rəğbətlə qarşılanır. Belə bir məkanın kənddə fəaliyyət göstərməsi ağsaqqalların bir araya gəlməsinə, onların zəngin həyat təcrübəsinin və dəyərli tövsiyələrinin gənc nəslə çatdırılmasına imkan yaradacaq.
Ağsaqqallar Azərbaycan cəmiyyətində hər zaman xüsusi hörmət və ehtiram sahibi olublar. Onların həyat təcrübəsi, müdrikliyi və milli-mənəvi dəyərlərin qorunmasında oynadıqları rol cəmiyyətimiz üçün mühüm əhəmiyyət daşıyır. Ağsaqqallara göstərilən diqqət və qayğı onların cəmiyyətdəki roluna verilən yüksək dəyərin ifadəsidir.
Sığdaş kəndində Ağsaqqallar evinin inşa olunması da milli-mənəvi dəyərlərimizə, yaşlı nəslə hörmət və ehtiramın növbəti nümunəsidir. Burada yaradılacaq şərait ağsaqqalların asudə vaxtlarının səmərəli təşkili ilə yanaşı, kəndin ictimai həyatında onların fəal iştirakına da töhfə verəcək.
Görüş zamanı rayon rəhbəri Sığdaş kəndinin ağsaqqallarına nərd taxtası hədiyyə edib. Hədiyyə ağsaqqallar tərəfindən minnətdarlıqla qarşılanıb.
Kənd ağsaqqalları göstərilən diqqət və qayğıya görə təşəkkürlərini bildirərək, onların sosial-mədəni həyatının daha da yaxşılaşdırılması istiqamətində görülən işləri yüksək qiymətləndiriblər.
