Masallıda narkomanlığın qarşısının alınması və sağlam həyat tərzinin təşviqi ilə bağlı maarifləndirici tədbir
24 sentyabr 2026-cı il tarixində Masallı Rayon İcra Hakimiyyətində “Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Rayon Komissiyası”nın təşkilatçılığı ilə narkomanlığın qarşısının alınması, sağlam həyat tərzinin təşviqi və əhalinin maarifləndirilməsi məqsədilə tədbir keçirilib.
Tədbir “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025–2030-cu illər üçün Dövlət Proqramı”nın həyata keçirilməsi üzrə Tədbirlər Planının 8.4.11-ci bəndinin icrası çərçivəsində təşkil olunub.
Maarifləndirici tədbirdə Rayon İcra Hakimiyyəti başçısının ərazi icra nümayəndəliklərinin, Masallı Rayon Polis Şöbəsinin, idarə, müəssisə və təşkilatların, bələdiyyələrin, qeyri-hökumət təşkilatlarının nümayəndələri və ictimaiyyət üzvləri iştirak ediblər.
Tədbirdə narkotik vasitələrin və psixotrop maddələrin qanunsuz dövriyyəsinin qarşısının alınması ilə yanaşı, narkomanlığın doğurduğu sosial fəsadlar, onun profilaktikası və sağlam həyat tərzinin formalaşdırılması istiqamətində maarifləndirmə işlərinin gücləndirilməsinin vacibliyi diqqətə çatdırılıb.
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Rayon Komissiyasının katibi Azər Bəhmənov çıxışında narkotik vasitələrin qanunsuz dövriyyəsinə qarşı mübarizə tədbirləri, narkomanlığın profilaktikası və əhali arasında maarifləndirmə işlərinin təşkili barədə məlumat verib.
Masallı Rayon Polis Şöbəsinin rəis müavini İxtiyar Talıbov narkotik vasitələrin qanunsuz dövriyyəsinin qarşısının alınması istiqamətində həyata keçirilən tədbirlərdən danışıb, bu sahədə əməliyyat-profilaktik tədbirlərin davam etdirildiyini bildirib.
Rayon Təhsil sektorunun müdiri Elman Rzayev yeniyetmə və gənclərin sağlam həyat tərzinə cəlb edilməsinin narkomanlığın profilaktikasında mühüm rol oynadığını vurğulayıb. Qeyd edilib ki, gənclərin asudə vaxtının səmərəli təşkili, onların idmana, elmə, təhsilə və müxtəlif ictimai fəaliyyətlərə yönləndirilməsi sağlam sosial mühitin formalaşdırılmasına mühüm töhfə verir. Bu məqsədlə rayonun təhsil müəssisələrində müxtəlif idman yarışları, maarifləndirici görüşlər və digər tədbirlər keçirilir.
Tədbirin sonunda Masallı Rayon İcra Hakimiyyəti başçısının birinci müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Rayon Komissiyasının sədri Tohid Hüseynov çıxış edib.
Tohid Hüseynov narkomanlığın insan sağlamlığına və cəmiyyətin sosial rifahına mənfi təsir göstərən ciddi təhlükə olduğunu qeyd edərək, bu istiqamətdə profilaktik və maarifləndirici tədbirlərin sistemli şəkildə davam etdirilməsinin vacibliyini vurğulayıb. Bildirilib ki, narkomanlığın qarşısının alınması yalnız hüquq-mühafizə tədbirləri ilə məhdudlaşmamalı, eyni zamanda sağlam həyat tərzinin təşviqi, ailə və məktəb mühitində düzgün tərbiyənin gücləndirilməsi, gənclərin faydalı fəaliyyətlərə cəlb olunması və ictimai fəallığının artırılması ilə müşayiət olunmalıdır.
Çıxışlarda kütləvi informasiya vasitələrinin və müasir kommunikasiya imkanlarının geniş təsir gücündən istifadə etməklə narkotik vasitələrin insan sağlamlığına və sosial həyata yaratdığı təhlükələr barədə əhalinin, xüsusilə yeniyetmə və gənclərin maarifləndirilməsinin əhəmiyyəti qeyd olunub.
Vurğulanıb ki, sağlam həyat tərzi yalnız zərərli vərdişlərdən uzaq olmaq deyil, həm də fiziki fəallıq, düzgün qidalanma, mənəvi dəyərlərə bağlılıq, təhsil və özünüinkişaf, asudə vaxtın səmərəli təşkili və sağlam sosial münasibətlərin formalaşdırılmasını özündə birləşdirir.
Tədbirdə narkomanlığa qarşı mübarizənin və sağlam həyat tərzinin təşviqinin bütün cəmiyyətin birgə səyi ilə daha səmərəli nəticə verdiyi diqqətə çatdırılıb. Bu baxımdan dövlət qurumları, hüquq-mühafizə orqanları, təhsil müəssisələri, ailələr, qeyri-hökumət təşkilatları və ictimaiyyət arasında əməkdaşlığın gücləndirilməsinin mühüm əhəmiyyət daşıdığı bildirilib.
Sonda qeyd olunub ki, sağlam gələcəyin formalaşdırılması üçün yeniyetmə və gənclərin idmana, elmə, təhsilə, yaradıcılığa və digər faydalı fəaliyyətlərə istiqamətləndirilməsi, onların sağlam sosial mühitdə yetişməsi və zərərli vərdişlərdən qorunması istiqamətində maarifləndirmə işlərinin davamlı şəkildə aparılması əsas prioritetlərdəndir.
