Masallıda Lokal Antiterror əməliyyatlarının 3-cü ildönümü ilə əlaqədar şəhid məzarları və ailələri ziyarət olunub
Azərbaycanın ərazi bütövlüyünün və suverenliyinin tam bərpa olunması ilə nəticələnən Lokal Antiterror əməliyyatlarının üçüncü ildönümü ilə əlaqədar Masallı rayonunda şəhidlərin əziz xatirəsi yad edilib, şəhid məzarları və ailələri ziyarət olunub.
Masallı Rayon İcra Hakimiyyətinin başçısı Araz Əhmədovun tapşırığına əsasən, rayon ərazisində Lokal Antiterror əməliyyatları zamanı şəhid olan hərbçilərin məzarlarının ziyarət edilməsi və ailələri ilə görüşlərin keçirilməsi istiqamətində tədbirlər həyata keçirilib.
Tədbirlər çərçivəsində Masallı şəhərində şəhid Mirzəyev Sənan Vüqar oğlunun, Xırmandalı kəndində isə şəhid Yusifli Şəmistan Şükran oğlunun məzarları ziyarət olunub. Şəhidlərin məzarları önünə gül dəstələri düzülüb, onların əziz xatirəsi dərin ehtiramla yad edilib, ruhlarına dualar oxunub.
Ziyarətlərdə Masallı Rayon İcra Hakimiyyəti başçısı aparatının Ərazi-təşkilat və ictimai-siyasi məsələlər şöbəsi müdirinin müavini, Ərazi-təşkilat məsələləri sektorunun müdiri Nahid Həsənov, İctimai-siyasi və humanitar məsələlər sektorunun müdiri Abbas Abbaszadə, Müharibə iştirakçıları və şəhid ailələri ilə işin təşkili sektorunun məsləhətçisi Tərlan Şahverdiyev, ərazi nümayəndəliklərinin və bələdiyyələrin nümayəndələri, şəhid ailələri, ziyalılar, din xadimləri, ağsaqqallar və ictimaiyyət nümayəndələri iştirak ediblər.
Görüşlər zamanı şəhidlərin keçdiyi şərəfli döyüş yolundan, onların Azərbaycanın ərazi bütövlüyünün və suverenliyinin təmin olunması uğrunda göstərdikləri qəhrəmanlıq və fədakarlıqdan bəhs olunub. Bildirilib ki, Vətən uğrunda canından keçən şəhidlərimizin əziz xatirəsi xalqımız tərəfindən daim ehtiramla yad edilir və onların qəhrəmanlığı gələcək nəsillər üçün örnəkdir.
