Masallılı paralimpiyaçının yeni qələbəsi
- 26-12-2018, 20:53
- İdman
- 0
- 1 349
Masallılı paralimpiyaçının yeni qələbəsi Boccia idman növü üzrə Paralimpiya Milli Komandamız İsrailin Tel-Əviv şəhərində keçirilən İsrail açıq çempionatında (18-23 dekabr) iştirak edib.
Masallılı paralimpiyaçı Bəhruz Mirzəyev bu beynəlxalq turnirdə də rəqiblərindən daha güclü olduğunu sübut edib.
Çempionatda Azərbaycan Millisi 6 idmançı ilə təmsil olunub. Yarışların yekun nəticələrinə görə bocciaçılarımızdan – BC-1 kateqoriyasında Mətanət Quliyeva I, BC-2 kateqoriyasında Sona Ağayeva II, Orxan Kərimov III, BC-4 kateqoriyasında Bəhruz Mirzəyev I, Xəyal İslamov isə II yeri tutub.
Çempionatın sonunda Azərbaycan və İsrailin BC-1, BC-2 komanda və BC-4 cütlükləri güclərini sınayıb və milli komandamız qalib gəlib.
Məlumat üçün bildirək ki, bu yaxınlarda İtaliyanın Olbiya şəhərində 15 Avropa komandası arasında təşkil olunan yarışlarda, açıq regional turnirdə Bəhruz Mirzəyev qızıl, millimiz isə komanda yarışında bürünc medala layiq görülüb. Boccia üzrə Paralimpiya millimizin beynəlxalq yarışda qazandığı bu möhtəşəm zəfərlə 30 yaşlı idmançımız İtaliyada tarix yazıb. Bəhruz Şakir oğlu Masallı rayonunun Viləş (Kalinovka) kəndində anadan olub.Qüeyd edək ki, Heydər Əliyev Fondunun vitse-prezidenti Leyla Əliyevanın təşəbbüsü ilə cari ilin martında yaradılan Boccia İdman Federasiyasının vitse-prezident Vüqar Əsgərov, baş katibi isə İlham Məhərrəmovdur.
Akif AĞAYEV,
“Yeni həyat”,
www.yeniheyet.az
