Masallıda Sərbəst və Yunan-Roma güləşi üzrə Lənkəran-Astara region açıq turniri keçirilib
- Bu gün, 21:33
- İdman
- 0
- 7
Oktyabrın 3-4-də Masallı Olimpiya İdman Kompleksində sərbəst və yunan-Roma güləşi üzrə Lənkəran-Astara region açıq turniri baş tutub. İkigünlük yarış Əməkdar məşqçi, SSRİ idman ustası, məşhur pəhləvan Nadir Ağayevin xatirəsinə və “Şöhrət” ordenli, “Əməkdar Bədən Tərbiyəsi və İdman Xadimi” Yaqub Məmmədovun 80 illik yubileyinə həsr olunub. Turnirdə respublikanın müxtəlif şəhər və rayonlarını təmsil edən 22 komandanın heyətində 2010–2012-ci il təvəllüdlü (U-17) 300 idmançı 15 çəki dərəcəsində mübarizə aparıb.
Yarışın rəsmi açılış mərasimində Lənkəran-Astara Regional Gənclər və İdman İdarəsinin rəis müavini Könül Manafova, Masallı Rayon İcra Hakimiyyəti Başçısı Aparatının böyük məsləhətçisi Zamin Məmmədov, Azərbaycan Güləş Federasiyasının baş katibi Pərvin Piriyev, “Şöhrət” ordenli Yaqub Məmmədov və RF Əməkdar məşqçisi Məşkur Qasımov çıxış ediblər. Natiqlər Nadir Ağayev güləş məktəbinin və Yaqub Məmmədovun Azərbaycan idmanındakı xidmətlərindən danışıb, əldə olunan nailiyyətləri ölkə rəhbəri, Milli Olimpiya Komitəsinin Prezidenti İlham Əliyevin idmana göstərdiyi diqqət və qayğının təzahürü kimi səciyyələndiriblər. Tədbirin keçirilməsində göstərdiyi dəstəyə görə bir neçə şəxs və təşkilat Regional İdarə tərəfindən fəxri fərman və təşəkkürnamələrlə təltif olunub.
Dünya Güləş Birliyinin təsdiq etdiyi qaydalar əsasında Azərbaycan Güləş Federasiyasının hakimlər heyəti tərəfindən idarə olunan yarışın keçirilməsində əsas məqsəd rayonlarda idmanın təbliği, yeniyetmələr arasında sərbəst və yunan-Roma güləşinin inkişafı, gənclərin vətənpərvərlik ruhunda tərbiyəsi, eləcə də milli yığma üçün perspektivli idmançıların seçilməsidir.
Gərgin mübarizə şəraitində keçən turnirin yekun nəticələrinə əsasən, komanda hesabında birinciliyi Masallı komandası qazanıb. Sumqayıt və Göyçay təmsilçiləri isə müvafiq olaraq ikinci və üçüncü yerlərə layiq görülüblər. Qaliblər təşkilat komitəsi və sponsorlar tərəfindən diplom, medal və pul mükafatları ilə təltif olunublar.
