Masallıda “Zəfər başlanğıcı – Tovuz döyüşləri” adlı tədbir keçirilib

 

Masallıda “Zəfər başlanğıcı – Tovuz döyüşləri” adlı tədbir keçirilib

12 iyul 2023-cü il tarixdə Masallıda, rayon tarix-diyarşünaslıq muzeyi və mərkəzi kitabxana sisteminin təşkilatçılığı ilə Tovuz döyüşlərinin üçüncü ildönümü ilə əlaqədar “Zəfər başlanğıcı – Tovuz döyüşləri” adlı tədbir keçirilib.

Muzeydə təşkil olunan dəyirmi masada Tovuz rayonu istiqamətində düşmən təxribatının qarşısını alarkən şəhidlik zirvəsinə ucalmış qəhrəman vətən oğlu mayor Anar Novruzovun doğmaları, şəhid ailələri, Qarabağ müharibəsi iştirakçıları, ictimaiyyət və media nümayəndələri, mədəniyyət işçiləri iştirak ediblər.

Tədbir öncəsi respublikamızın suverenliyi və ərazi bütövlüyü uğrunda şəhid olan Vətən övladlarının xatirəsi bir dəqiqəlik sükutla yad olunub. 

 

Muzeyin direktoru, Əməkdar mədəniyyət işçisi Əntiqə Tağıyeva, “Azərbaycan Respublikası Müharibə, Əmək və Silahlı Qüvvələr” İctimai Birliyi Masallı rayon təşkilatının sədri Məmmədağa Şiriyev, “Cənub.az” saytının redaktoru Zahir Əmənov, “Respublika” qəzetinin bölgə müxbiri Əlisəfa Həsənov, yazıçı-publisist Nurəddin Ədiloğlu, «Yeni həyat» qəzetinin əməkdaşı Akif Ağayev, “Azərbaycan Bayrağı” ordenli şəhid Sahib Şirəliyevin atası Yusif Şirəliyev, ehtiyatda olan hərbçi Ədalət Hüseynov çıxışlarında 2020-ci il iyulun 12-də Ermənistanın Azərbaycanın Tovuz rayonu istiqamətində ölkəmizə qarşı törətdiyi təxribatın qarşısının alınmasında qəhrəmanlıq göstərmiş general-mayor Polad Həşimov, polkovnik İlqar Mirzəyev, mayor Namiq Əhmədov və Anar Novruzov, eləcə də digər zabit və əsgərlərimizin şərəfli, müqəddəs ömür yolunun gənclərə, gələcək nəsillərə örnək olduğunu, eləcə də Tovuz döyüşlərinin hər birimizin Ali Baş Komandan cənab İlham Əliyevin  ətrafında daha sıx birləşməsinə zəmin yaratdığını və bu ordu-xalq birliyinin 44 günlük Vətən müharibəsində qazanılan böyük Zəfərlə nəticələndiyini diqqətə çatdırıblar.

3-cü dərəcəli “Vətənə xidmətə görə” ordenli şəhid mayor Anar Novruzovun qardaşı Sucəddin Novruzov, eləcə də tədbirə videobağlantı vasitəsilə qoşulan, Azərbaycanın Milli Qəhrəmanları – şəhid, general-mayor Polad Həşimovun qardaşı İlham Həşimov, polkovnik İlqar Mirzəyevin qardaşı Rafael Mirzəyev qardaşları ilə fəxr etdiklərini, dövlətimiz tərəfindən diqqət və qayğı ilə əhatə olunduqlarını qeyd edərək tədbirin təşkilinə görə əməyi olan hər kəsə minnətdarlıqlarını bildiriblər.