Rüşvət almaqda təqsirləndirilən vəzifəli şəxs həbs olunub
- 22-01-2024, 17:03
- Maraqlı
- 0
- 158
Təhsil müəssisələrində korrupsiya hallarına qarşı mübarizə davam etdirilir.
Baş Prokurorluğun mətbuat xidmətindən verilən məlumata görə, 2017-2022-ci illərdə Quba Rayon Təhsil Şöbəsinin müdiri (hazırda ləğv olunub) və 2023-cü il noyabrın 27-dək Elm və Təhsil Nazirliyinin Quba-Xaçmaz Regional Təhsil İdarəsinin müdiri vəzifəsində işləmiş Rüfət Hacıyev Malik oğlunun qanunsuz əməlləri barədə daxil olmuş məlumat əsasında Baş prokuror yanında Korrupsiyaya qarşı Mübarizə Baş İdarəsində cinayət işi başlanıb.
Rüfət Hacıyevin işlədiyi müddətdə əmək müqaviləsinin müddətinin uzadılması, məktəb direktoru vəzifəsinə təyin olunma, məktəblərdə müvafiq yoxlamaların keçirilməməsi, eləcə də xidmət üzrə ümumi himayədarlıq göstərilməsi kimi məqsədlərlə ayrı-ayrı şəxslərdən ümumilikdə 53 min manat pul vəsaitini təkrarən rüşvət qismində almasına əsaslı şübhələr müəyyən edilib.
İlkin sübutlar əsasında Rüfət Hacıyevə Cinayət Məcəlləsinin 311.3.2-ci və 311.3.3-cü (rüşvət alma təkrar və külli miqdarda törədildikdə) maddələri ilə ittiham elan edilmiş və barəsində məhkəmənin qərarı ilə həbs qətimkan tədbiri seçilib.
Hazırda cinayət işi üzrə ibtidai istintaq davam etdirilir.
"Yeni həyat" qəzeti,
www.yeniheyet.az
