“Yaşadırıq və yaradırıq” – Masallıda Əlillər Günü qeyd edilib
- 3-12-2024, 08:37
- Maraqlı
- 0
- 245
Masallı rayonunda Beynəlxalq Əlillər Gününə həsr olunmuş “Yaşadırıq və yaradırıq” adlı tədbir keçirilib.
Masallı Tarix-Diyarşünaslıq Muzeyində təşkil olunan tədbirdə rayon rəsmiləri, mədəniyyət işçiləri, aidiyyatı təşkilatların əməkdaşları, fiziki məhdudiyyətli uşaqlar və valideynləri iştirak ediblər.
Muzeyin direktoru Əntiqə Tağıyeva, rayon icra hakimiyyətinin ictimai-siyasi və humanitar məsələlər şöbəsinin baş məsləhətçisi Nuranə Muradova, Masallı “Günərzi Qayğı Mərkəzi”nin direktoru Səbirə Əbilova, Lənkəran-Astara Regional Mədəniyyət İdarəsinin rayon üzrə nümayəndəsi Salman Yunusov, “Yeni həyat” qəzetinin əməkdaşı Akif Ağayev, Sosial Xidmətlər Agentliyinin Lənkəran-Astara regional filialının baş mütəxəssisi İntiqam Bağırov, rayon mərkəzi kitabxana sisteminin direktor əvəzi Zamin Məmmədov və başqaları ölkəmizdə əlillərin sosial müdafiəsini gücləndirmək sahəsində ardıcıl həyata keçirilən tədbirlərdən danışıb, bu gün respublikamızda sosial cəhətdən həssas qruplarla, o cümlədən əlillərlə bağlı sosial proqramların geniş miqyas aldığını, bu cür tədbirlərin fiziki məhdudiyyətli şəxslərə böyük stimul verdiyini vurğulayıblar.
Çıxışlar zamanı əlillərin, xüsusilə fiziki məhdudiyyətli uşaqların cəmiyyətə tam qovuşması üçün dövlət tərəfindən əlverişli şəraitin yaradılması ilə yanaşı, bu işdə onlara, ailələrinə mənəvi dəstəyin vətəndaşlıq borcu olduğu diqqətə çatdırılıb.
İştirakçılar əlilliyi olan şəxslərin istedad və bacarıqlarının, yaradıcı potensialının aşkarlanması, onların cəmiyyətə inteqrasiyası yönümündə fikir və tövsiyələrini səsləndiriblər.
Fiziki məhdudiyyətli uşaqların valideynləri onlara göstərilən diqqət və qayğıya görə Prezident İlham Əliyevə, ölkənin Birinci vitse-prezidenti Mehriban xanım Əliyevaya və rayon rəhbərinə minnətdarlıqlarını bildiriblər.
Akif AĞAYEV.
