Azərbaycanın zəfər ruhlu Novruz Bayramı

Novruz Bayramı, Azərbaycanın dərin köklərə malik milli və mənəvi dəyəri, həmçinin dövlət və xalq arasında birliyi möhkəmləndirən bayramdır. Hər il martın 21-də qeyd olunan bu bayram, yalnız təbiətin bahar təzələnməsinin deyil, həm də Azərbaycan xalqının birliyi və dostluğunun, əzmkarlığının və gücünün rəmzidir. Ulu Öndər Heydər Əliyev tərəfindən Novruz bayramının milli həmrəyliyin və yüksək mənəviyyatın simvolu olaraq vurğulandı. Bu bayram, xüsusən də müstəqil Azərbaycanın tarixi və siyasi inkişafında böyük əhəmiyyət daşıyır. Ulu öndər demişdir: “Bu bayram bir də onunla fərqlənir və səciyyələnir ki, bu bayramda siyasi baxışlarından, siyasi dünyagörüşündən asılı olmayaraq hamı bayram edir. Əgər bu günümüzü götürsək, iqtidar da, müxalifət də bayram edir, bir-birini sevən də bayram edir, bir-birinə düşmən olan da. Amma bayramın bizə bəxş etdiyi ən gözəl nemət ondan ibarətdir ki, qədim zamanlardan bu bayramda insanlar kin-küdurəti unudur, küsülülər barışır, ziddiyyətlər aradan götürülür. Demək, bu, dostluq, həmrəylik, yüksək mənəviyyat bayramıdır. 

Ona görə də Novruz bayramını hər il böyük el bayramı kimi, hər bir insanın şəxsi bayramı kimi qeyd edərək biz istəyirik, arzu edirik və bu, Azərbaycan vətəndaşlarının əksəriyyətinin arzusudur ki, ölkəmizdə milli həmrəylik, vətəndaş həmrəyliyi, birliyi olsun. Bu ali məqsədləri, ali fikirləri ulu babalarımız bizə nəsihət ediblər. Bu bayram yaranandan onun xüsusiyyətləri insanları həmişə dostluğa, həmrəyliyə, qarşılıqlı anlaşmaya dəvət edibdir.”  Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi altında Azərbaycan Ordusunun azad etdiyi torpaqlar artıq 5 ildir Novruz bayramını qeyd edir. Bu bayram, yalnız doğma Qarabağda və Şuşada deyil, bütün Azərbaycanda zəfər ruhunu, torpaqların işğaldan azad edilməsini təmsil edir.

 Prezident İlham Əliyevin 2021-ci ildə Şuşada, Cıdır düzündəki Novruz bayramı münasibətilə söylədiyi sözlər, Azərbaycanın azadlığına və ərazi bütövlüyünə olan bağlılığını, həmçinin Qarabağda Novruz bayramını qeyd etməyi nə qədər arzuladıqlarını göstərir. Bu, həm də Ulu Öndər Heydər Əliyevin vəsiyyətinin, Azərbaycanın müstəqil və ərazi bütövlüyü uğrunda apardığı mübarizənin nəticəsidir. Beynəlxalq Səviyyədə də Novruz bayramı təsdiqini tapıb. Azərbaycanın müstəqil dövlət olaraq beynəlxalq aləmdəki mövqeyi də Novruz bayramının qlobal səviyyədə tanınmasında əhəmiyyətli rol oynayıb. Ölkənin birinci xanımı Mehriban xanım Əliyevanın səy və əzmi nəticəsində Novruz bayramı, UNESCO-nun Qeyri-Maddi Mədəni İrs siyahısına daxil edilmişdir. Bu bayramın həm regional, həm də beynəlxalq səviyyədə tanınması, Azərbaycanın mədəniyyətinin və ənənələrinin dünyaya təqdim edilməsi baxımından mühüm bir addım olub. Novruz, artıq yalnız Azərbaycanın deyil, bütün Şərq və türk dünyasının birliyi və dostluğunun rəmzi sayılır. 

Novruz Bayramı həm də yüksək mənəvi dəyərlərə malikdir. Bu bayram eyni zamanda, Azərbaycanın milli və mənəvi dəyərlərinin təbliğatçısıdır. Bayramın simvolları arasında səməni, yumurta döyüşdürmək, "papaq atmaq" və digər folklor elementləri xalqımızın zəngin tarixi və mədəniyyətini təmsil edir. Bu adətlər, insanların bir-biri ilə əlaqə qurması, qohumların və dostların bir araya gəlməsi və münasibətlərin yenidən bərpası üçün böyük əhəmiyyət daşıyır. Azərbaycanın Novruz bayramı münasibətilə həmrəyliyi və qardaşlığı tərənnüm edən bu ənənələr, ölkəmizin siyasi mədəniyyətinin inkişafına da öz töhfəsini verir. Eyni zamanda, bu bayramın qeyd edilməsi, Azərbaycanın dünya miqyasında təsdiqlənmiş siyasi müstəqilliyinin və ərazi bütövlüyünün rəmzi sayılır. Birinci xanım Mehriban Əliyevanın Novruz Bayramına töhfəsi isə dəyərinə və əhəmiyyətinə görə çox önəmlidir. 

Birinci vitse-prezident Mehriban Əliyevanın təşəbbüsləri və rəhbərliyi altında həyata keçirilən "Hərəyə bir ağac əkək" kampaniyası, Novruz bayramının ekoloji aspektini də ön plana çıxarır. Bu kampaniya çərçivəsində Azərbaycanda minlərlə ağac əkilmiş və yeni parklar salınmışdır. Bu təşəbbüs, yalnız təbiəti qorumaqla qalmır, həm də gələcək nəsillərə yaşıl bir irs qoymağı hədəfləyir. Mehriban xanım Əliyevanın Novruz bayramı münasibətilə təbriklərində, xalqın xoşbəxtliyi, uzun ömrü və sağlamlığına olan diləkləri də bayramın mənəvi zənginliyini göstərir. Novruz bayramı Azərbaycan xalqının çoxçalarlı incəsənətin güzgüsüdür, habelə milli mədəniyyətimizdə sülh, mehriban qonşuluq və tolerantlıq kimi ümumbəşəri dəyərlərə sadiqliyinin tarixi təcəssümüdür. Novruz bayramı ölkəmizin siyasi proseslərində bayramlaşma təcrübəsinə də səbəb olmuşdur. Novruz bayramı münasibətilə Azərbaycan Respublikasının Prezidenti cənab İlham Əliyev ilə ölkəmizdə fəaliyyət göstərən siyasi partiyalarının rəhbərləri arasında qarşılıqlı bayramlaşma ölkədə yeni, mütərəqqi siyasi mədəniyyətin təşəkkülünü göstərir. Onu da demək yerinə düşər ki, Novruz bayramı, yalnız Azərbaycanın deyil, bütün dünya xalqlarının ortaq mənəvi irsidir. 

Azərbaycanın müstəqilliyi, ərazi bütövlüyü və milli birliyi ilə bağlı verdiyi mesajlar, bu bayramın ümumbəşəri dəyəri ilə sıx əlaqəlidir. Azərbaycan xalqı, Ulu Öndər Heydər Əliyevin qoyduğu miras əsasında, hər il Novruz bayramını qeyd edərkən, eyni zamanda bu bayramın siyasi və mədəni həyatımıza verdiyi qiymətli dərsləri unutmur. Novruz bayramı, dostluq, həmrəylik və yüksək mənəviyyat bayramı olaraq, ölkəmizin gələcək nəsillərinə davamlı birliyə və əzmkarlığa töhfə verməyə davam edəcək.