Bir ağacda beş cür meyvə...
- 27-05-2025, 07:45
- Maraqlı
- 0
- 90
Masallı rayonunun Ərkivan qəsəbə sakini Oruc Nəzərov uzun illərdir ki, meyvə ağaclarını calaq etməklə məşğuldur. O, bu üsulla bir ağacda 4 cür alma, digər gövdə üzərində 5 növ gavalı, şaftalı ağacında isə ərik və digər meyvə növlərini yetişdirib.
Calaq ustasının sözlərinə görə may, avqust və sentyabr ayları calaqvurma dövrüdür. Fərqli və məhsuldar ağac növləri əldə etməkdən ötrü calaqvurmanın öz vaxtı, üsul və incəlikləri var.
Meyvə bitkilərinin calaq edilməsində qələm, keçirtmə, yarma, qabıq, göz, lülə (üskük) calaq üsullarından istifadə edən təsərrüfatçı deyir ki, ağacın ömrü yerli şəraitə uyğun seçilmiş calaqaltının xəstəliyə, zərərvericilərə davamlı, geniş kök sisteminə malik olmasından asılıdır.
Həyətyanı sahədə, tinglərin becərildiyi bağda albalı, gilas, alça, gavalı, ərik, şaftalı, heyva, xar tut, şah tut və digər meyvələrin calağına rast gəlmək olur. Bağban ağacların suvarılmasına, onlara vaxtında qulluq göstərilməsinə diqqət edir.
Yüzlərlə növ ting yetişdirib satışını həyata keçirən təsərrüfat sahibi bir meyvə fidanının satış qiymətinin tingin neçə illik olmasına uyğun olaraq dəyişdiyini bildirir.
Oruc Nəzərov eyni zamanda təsərrüfatında 220 ədəd göycə alçası da yetişdirir. Hazırda məhsul dərimidir.
Akif AĞAYEV
