Masallıda “Uşaq hüquqlarımızı bilək!” mövzusunda maarifləndirici görüş 

16 dekabr 2025-ci il tarixində Masallı rayon Tarix-Diyarşünaslıq Muzeyində Masallı Rayon İcra Hakimiyyəti, Tarix-Diyarşünaslıq Muzeyi və  Ailə, Qadın və Uşaq Problemləri üzrə Dövlət Komitəsinin yanında fəaliyyət göstərən Uşaq Səfirlər Məclisinin Masallı rayon nümayəndəliyinin birgə təşkilatçılığı ilə “Uşaq hüquqlarımızı bilək!” mövzusunda maarifləndirici tədbir keçirilib.

Əvvəlcə Ulu Öndər Heydər Əliyevin və Vətənimizin ərazi bütövlüyü uğrunda canından keçən şəhidlərin əziz xatirəsi bir dəqiqəlik sükutla yad edilib.   

Tədbiri giriş sözü ilə açan Masallı rayon Tarix-Diyarşünaslıq Muzeyinin direktoru Əntiqə Tağıyeva ölkəmizdə uşaq hüquqlarının qorunması və təmin edilməsi istiqamətində müvafiq dövlət orqanları tərəfindən öz səlahiyyətləri daxilində xüsusi həssaslıqla yanaşaraq lazimi tədbirlərin həyata keçirildiyini vurğulamışdır. Çıxışçı bildirmişdir ki, uşaq hüquqları cəmiyyətin sağlam və ədalətli inkişafı üçün böyük əhəmiyyət daşıyır. Hər bir uşaq yaşamaq, təhsil almaq, sağlam böyümək və zorakılıqdan qorunmaq hüququna malikdir. Bu hüquqlar uşaqların fiziki və mənəvi inkişafını təmin edir, onların gələcəkdə faydalı vətəndaş kimi formalaşmasına kömək edir. Uşaq hüquqlarına hörmət edildikdə uşaqlar özlərini təhlükəsiz və dəyərli hiss edirlər. Bu isə onların öz qabiliyyətlərini sərbəst şəkildə inkişaf etdirməsinə şərait yaradır. Cəmiyyətin və dövlətin əsas vəzifələrindən biri uşaqların hüquqlarını qorumaq və onlara bərabər imkanlar yaratmaqdır. Nəticə etibarilə, uşaq hüquqlarının qorunması təkcə uşaqlar üçün deyil, bütün cəmiyyət üçün vacibdir. Çünki bu günün uşaqları sabahın gələcəyidir.

Çıxış edən Masallı Rayon İcra Hakimiyyətinin aparıcı məsləhətçisi - Uşaq hüquqlarının müdafiəsi üzrə komissiyanın uşaq və ailələrlə iş üzrə məsləhətçi – psixoloqu  Aybəniz Novruzova bir psixoloq kimi qeyd etmək istərdim ki, uşaq hüquqları uşağın sağlam psixoloji inkişafının əsas dayaqlarından biridir. Uşağın təhlükəsiz mühitdə yaşamaq, sevgi və qayğı görmək, fikrini sərbəst ifadə etmək və təhsil almaq hüquqları onun şəxsiyyət kimi formalaşmasına birbaşa təsir göstərir. 

Bu hüquqlar pozulduqda uşaqlarda qorxu, özgüvən çatışmazlığı və emosional problemlər yarana bilər. Uşaq hüquqlarına əməl olunan mühitdə böyüyən uşaqlar özlərini dəyərli hiss edir, sosial münasibətlər qurmaqda və qərar verməkdə daha inamlı olurlar. Psixoloji baxımdan bu, sağlam cəmiyyətin formalaşmasının əsas şərtidir. Valideynlərin, müəllimlərin və cəmiyyətin digər üzvlərinin uşaqlara anlayışla yanaşması onların emosional rifahını gücləndirir. Nəticə olaraq, uşaq hüquqlarının qorunması yalnız hüquqi məsələ deyil, eyni zamanda psixoloji sağlamlığın təmin edilməsidir. Sağlam ruhlu uşaqlar isə güclü və balanslı cəmiyyətin əsasını təşkil edir.

Tədbirdə çıxış edən Uşaq Səfirlər Məclisin regional nümayəndələri Turan Əlisoy və Mirturan Hüseynov  Məclisin yaranma tarixi, fəaliyyəti və məqsədləri haqqında qısa məlumat vermişdir. Daha sonra tədbir iştirakçılarına Uşaq hüquqları ilə bağlı hazırlanmış təqdimat nümayış olunmuşdur. 

Nümayəndələr BMT-nin Baş Assambleyası tərəfindən qəbul edilmiş Uşaq Hüquqları Konvensiyasında 4 əsas qrupa bölünmüş hüquqlardan (yaşamaq hüququ, inkişaf hüququ, madafiə hüququ, iştirak hüququ) geniş məlumat verərək hüquqların bilməsi uşağın inkişafına necə təsir edəcəyini izah etmişlər.  

Tədbirdə şagirdlərə mövzu ilə bağlı qısa mətnlər oxunaraq hansı hüququnun pozulmasına dair interaktiv oyun keçirilmiş və iştirakçıları maraqlandıran suallar cavablandırılmışdır.

Diskussiya formatında keçirilən tədbirdə fəallığı ilə seçilmiş məktəb şagirdlərinə təltifnamələr təqdim olunmuşdur.