Rəqəmsal inkişaf Azərbaycanın dövlət siyasətinin prioritet istiqamətidir
- 16-02-2026, 12:25
- Maraqlı
- 0
- 774
Prezident İlham Əliyevin sədrliyi ilə keçirilən “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirə ölkənin rəqəmsal transformasiya sahəsində qarşıya qoyduğu məqsədlərin əhəmiyyətini bir daha nümayiş etdirdi. Müşavirədə dövlət idarəçiliyində müasir texnologiyaların tətbiqi, süni intellektin inkişafı və rəqəmsal infrastrukturun gücləndirilməsi istiqamətində görüləcək işlər müzakirə olundu.
Dövlət başçısı çıxışında qeyd etdi ki, rəqəmsal inkişaf Azərbaycanın gələcək iqtisadi və sosial tərəqqisini müəyyən edən əsas amillərdən biridir. Prezident İlham Əliyev vurğuladı: “Bu məsələ bizim gələcək inkişafımızı böyük dərəcədə şərtləndirəcək. Bu gün süni intellektin tətbiqi, data mərkəzlərinin yaradılması, rəqəmsallaşma ilə bağlı islahatlar faktiki olaraq ölkələrin gələcək inkişafını müəyyən edir.”
Prezidentin sözlərinə görə, qlobal texnoloji dəyişikliklər fonunda Azərbaycanın rəqabət qabiliyyətinin artırılması üçün rəqəmsallaşma əsas prioritetlərdən biri olmalıdır. Bu məqsədlə vahid fəaliyyət planının hazırlanması və dövlət qurumları arasında koordinasiyanın gücləndirilməsi nəzərdə tutulur.
Yeni rəqəmsal arxitektura dövlət xidmətlərinin daha operativ və şəffaf şəkildə təqdim olunmasına, iqtisadiyyatın qeyri-neft sektorunun inkişafına, innovasiya mühitinin genişlənməsinə və ölkənin beynəlxalq rəqəmsal layihələrdə iştirakının artmasına xidmət edəcək.
Həsənova Lətifə,
Masallı rayon Heydər Əliyev mərkəzinin əməkdaşı
