Prezident İlham Əliyevin II Azərbaycan Beynəlxalq İnvestisiya Forumu çərçivəsində keçirilən tədbirdə çıxışı barədə
- 29-09-2026, 08:54
- Maraqlı
- 0
- 248
2026-cı il sentyabrın 26-da Bakıda II Azərbaycan Beynəlxalq İnvestisiya Forumu çərçivəsində “Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzusunda tədbir keçirilib. Prezident İlham Əliyev tədbirdə iştirak edərək moderatorun suallarını cavablandırıb.
Çıxışda Azərbaycanın dayanıqlı iqtisadi inkişafı, investisiya mühitinin yaxşılaşdırılması və iqtisadiyyatın şaxələndirilməsi məsələləri xüsusi diqqət mərkəzində olub. Prezident Azərbaycanın son 20 ildə 350 milyard ABŞ dollarından çox investisiya cəlb etdiyini, bunun təxminən yarısının birbaşa xarici investisiyalar olduğunu bildirib.
Dövlət başçısı gələcək inkişafın əsas istiqamətləri kimi bərpaolunan enerji, nəqliyyat-logistika, tranzit və rəqəmsal infrastrukturun əhəmiyyətini vurğulayıb. Xəzər dənizində külək enerjisi potensialından, elektrik enerjisinin ixrac imkanlarından və Azərbaycanı regional enerji və nəqliyyat bağlantılarının mühüm həlqəsinə çevirən layihələrdən bəhs edib.
Prezident həmçinin qeyd edib ki, neft-qaz sektoru yaxın perspektivdə Azərbaycan iqtisadiyyatında mühüm rolunu qoruyacaq, əldə olunan gəlirlər isə digər iqtisadi sahələrin inkişafına yönəldiləcək. Bununla yanaşı, kənd təsərrüfatı və ərzaq təhlükəsizliyi də investorlar üçün potensial istiqamətlər sırasında göstərilib.
Çıxışın əsas məqamlarından biri Azərbaycanın sabitlik, təhlükəsizlik, proqnozlaşdırılan iqtisadi və vergi mühiti əsasında uzunmüddətli investisiyalara açıq olması fikri olub. Prezident xarici investorlarla əməkdaşlıqda kapitalın əldə edilməsi ilə yanaşı, müasir texnologiyaların, təcrübənin və innovasiyaların ölkəyə gətirilməsinin də mühüm olduğunu vurğulayıb.
II Azərbaycan Beynəlxalq İnvestisiya Forumunun nəticəsi olaraq beynəlxalq investorlar və tərəfdaş şirkətlərlə ümumi dəyəri 10,8 milyard ABŞ dolları olan investisiya layihələrini əhatə edən 23 sənəd imzalanıb.
Nəticə olaraq, Prezident İlham Əliyevin çıxışında Azərbaycanın investisiya imkanları, iqtisadiyyatın şaxələndirilməsi, enerji və nəqliyyat bağlantılarının genişləndirilməsi, regional əməkdaşlıq və uzunmüddətli iqtisadi inkişaf prioritetləri ön plana çəkilib. Forum Azərbaycanın beynəlxalq investorlarla əməkdaşlığının və regional iqtisadi əlaqələrinin genişləndirilməsi baxımından mühüm platforma kimi təqdim olunub.
Muxtarov Rövşən Fətiağa oğlu,
Masallı raroyu, Güllütəpə kəndi
