Dil bir xalqın ruhudur, kimliyidir
- 23-04-2025, 23:30
- Maraqlı
- 0
- 152
Ulu Öndər Heydər Əliyev Azərbaycan xalqının milli mənsubiyyətinin, tarixi köklərinin, mədəniyyətinin, dünya görüşünün qorunmasında Azərbaycan dilinin rolu kimi amillərə hər zaman önəm vermişdir.
O, Azərbaycan dilini xalqımızın milli iftixari kimi qiymətləndirmiş, onun saflığını, zənginliyini qorumaq üzrə çoxsaylı addımlar atmışdır. Heydər Əliyev natiqliyində Azərbaycan dilinin bütün incəliklərindən ustalıqla istifadə etməklə yanaşı, onu dövlət idarəetməsinin və ictimai-siyasi həyatın əsas ünsuruna çevirmişdir.
Onun hakimiyyətdə olduğu illərdə dövlət dili statusunun formal deyil, real şəkildə tətbiqi istiqamətində ciddi səylər göstərilmişdir. Ulu Öndər dil siyasətində milli maraqları prioritet kimi qiymətləndirmişdir.
O bildirirdi ki, "dil bir xalqın ruhudur, kimliyidir". Onun bu yanaşması Azərbaycan dilinin qorunması və təbliği istiqamətində bir sıra fərman və sərəncamların imzalanmasına səbəb olmuşdur.
Eyni zamanda, Ümummilli lider Heydər Əliyevin hakimiyyətdə olduğu dövrdə dilimizin tədrisi sahəsində də işlər görülmüşdür. Məktəblərdə, ali təhsil ocaqlarında Azərbaycan dili fənni daha sistemli və dərinlikli öyrədilməyə başlanıb. Həmçinin, kütləvi informasiya vasitələrində dildən istifadənin normativləşdirilməsi sahəsində addımlar atılıb.
Bu siyasətin davamı olaraq, bu gün Azərbaycan dili dünya azərbaycanlılarını birləşdirən, milli-mənəvi birlik rəmzinə çevrilib. Ulu Öndərin bu istiqamətdəki məramı bu gün də davam etdirilir və dilimizə verilən dəyər artan xətlə qorunur.
Cəmaləddin Cabbarov,
Masallı rayon Mahmudavar kənd tam orta məktəbinin müəllimi
