Sağlam cəmiyyət və sağlam gələcək naminə”
- 9-07-2025, 16:34
- Maraqlı
- 0
- 241
09 iyul 2025-ci il tarixdə Yeni Azərbaycan Partiyası Masallı rayon təşkilatı Masallı rayon İcra Hakimiyyəti ərazi partiya təşkilatı ilə birgə narkomaniyaya qarşı mübarizə ilə bağlı təbliğat işinin daha da gücləndirilməsi, maarifləndirmə tədbirlərinin sistemli və əlaqəli şəkildə həyata keçirilməsi məqsədilə “Sağlam cəmiyyət və sağlam gələcək naminə” mövzusunda tədbir keçirilmişdir.
Tədbiri giriş sözü ilə Yeni Azərbaycan Partiyası Masallı rayon təşkilatının sədri Seyfəddin Əliyev açmış, Ulu öndər Heydər Əliyevin, eləcə də Vətən müharibəsində Şəhid olanların əziz xatirəsi 1 dəqiqəlik sükutla yad edilmişdir.
Yeni Azərbaycan Partiyası Masallı rayon təşkilatının sədri Seyfəddin Əliyev müasir dövrümüzdə insanlıq üçün böyük bəlaya çevrilən narkomaniya ilə mübarizənin vacibliyindən, bu problemə ictimai nəzarətin zəruriliyindən bəhs edib.
Natiq vurğulayıb ki, narkomaniya ilə mübarizə sağlam cəmiyyətin formalaşması baxımından əsas məqsəd və vəzifələrdəndir. Azərbaycanın dövlət siyasətində başlıca vəzifə olan, sağlam nəslin formalaşması istiqamətində həyata keçirilən tədbirlər sırasında mühüm istiqamət kimi diqqət yetirilən narkomaniya ilə mübarizə kampaniya xarakterli deyil, davamlı siyasətdir. Narkomaniya ilə mübarizə və onun profilaktikası mühüm məsələ olmaqla yanaşı, gənclərin formalaşması, onların sağlam böyüməsində ən vacib amillərdən biridir. Onun sözlərinə görə narkomaniyaya qarşı mübarizə məqsədilə vətəndaş cəmiyyətinin imkanlarından maksimum istifadə edilməli, gənclər arasında bu kimi zərərli vərdişlərin mənfi fəsadları haqqında, onun həyatımıza və sağlamlığımıza təhlükə, mənəviyyatımıza və dinimizə zidd olması barədə məlumatlar verilməlidir.
Sağlamlıq üçün ciddi təhlükə yaradan və cinayətkarlığın artmasına təkan verən narkomaniyanın ən böyük sosial bəlalardan biri olduğunu vurğulayan Seyfəddin Əliyev narkomaniya ilə mübarizdə hər bir vətəndaş fəallıq göstərməlidir deyə bildirmişdir. Qeyd edilmişdir ki, yeniyetmə və gənclərin bu sahədə daha da maarifləndirilməsi onlar arasında narkomaniyaya və onu yayan vərdişlərə qarşı müqaviməti xeyli artırır. Bu da ən əsası həm indiki, həm də gələcək nəsillərin cəmiyyətdə sağlam yetişmələri üçün həlledici rol oynayacaqdır.
Tədbirdə iştirak edən Masallı rayon İcra hakimiyyəti aparatının hüquq şöbəsinin məsləhətçisi Azər Bəhmənov çıxış edərək narkomaniyanın insanların sağlamlığına mənfi təsirləri barədə ətraflı məlumat verdi. Narkomaniya ilə mübarizədə ictimai nəzarətin əhəmiyyəti diqqətə çatdırılaraq, bu sahədə həyata keçirilən mübarizə tədbirlərindən danışılıb, ölkəmizdə narkomaniyaya qarşı həyata keçirilən genişmiqyaslı maarifləndirmə tədbirlərinin mütəmadi xarakter daşıdığı vurğulanıb. Həmçinin gənclərə vətənpərvər, ölkəmizə layiqli vətəndaş olmaları, Vətəni hər zaman qorumaları və zərərli vərdişlərdən uzaq durmaları tövsiyə edilib.
Tədbirdə Hişkədərə kənd tam orta məktəbin müəllimi Əlizamin Məmmədəliyev, Mahmudavar kənd sakini İsa Səttarov və başqaları çıxış edərək hazırda narkomaniya ilə mübarizə bütün dünyada qlobal çağırışlardan biri olduğunu və belə bir şəraitdə maarifləndirmə işlərinə böyük ehtiyac vardır deyə vurğuladılar.
