Masallıda görmə məhdudiyyətli insanlar üçün “Soyuq Günəş” filmi səsləndirildi

28 oktyabr tarixində Masallı rayon Heydər Əliyev Mərkəzində Masallı Rayon İcra Hakimiyyəti və “Regional Hüquqi və İqtisadi Maarifləndirmə” İctimai Birliyinin birgə təşkilatçılğı ilə “Zülməti dələn işıq” adlı layihənin təqdimat tədbiri keçirilmişdir.

Tədbirdə Masallı Rayon İcra Hakimiyyəti başçısının vəzifəsini müvəqqəti icra edən Tohid Hüseynov, Milli Məclisin deputatı İlham Məmmədov, RİHB aparatın əməkdaşları,  “Regional Hüquqi və İqtisadi Maarifləndirmə” İctimai  Birliyinin sədri Arzu Bağırova, media nümayəndələri, rayon ziyalıları və görmə məhdudiyyətli insanlar iştirak etmişlər.
Tədbirin əvvəlində Ulu Öndər Heydər Əliyevin və torpaqlarımızın işğaldan azad olunması uğrunda gedən döyüşlərdə qəhrəmancasına şəhid olmuş şəhidlərin xatirəsi bir dəqiqəlik sükutla yad edilib və Azərbaycan Respublikasının Dövlət Himninin səsləndirilməsi ilə başlanılıb.

Tədbiri giriş nitqi ilə açan “Regional Hüquqi və İqtisadi Maarifləndirmə” İctimai  Birliyinin sədr müavini Nilufər Lətif “Zülməti dələn işıq” adlı layihənin mahiyyətindən geniş bəhs edərək diqqətə çatdırdı ki, layihə çərçivəsində hazırlanan “Soyuq Günəş” filmi ilk dəfə olaraq səsli bətimləmə ilə təqdim olunur. Bu, görmə imkanları məhdud şəxslərin də mədəni həyata bərabər şəkildə qoşulması baxımından çox önəmli addımdır.

Sonra Masallı Rayon İcra Hakimiyyəti başçısının vəzifəsini müvəqqəti icra edən Tohid Hüseynov qonaqları və tədbir iştirakçılarını Masallı Rayon İcra Hakimiyyətinin başçısının adından salamlayaraq cəmiyyətdə inkluziv və bərabər imkanların təbliği, eləcə də sosial həssas qrupların mədəni həyata inteqrasiyası üçün önəmli olan, görmə məhdudiyyətli şəxslər üçün xüsusi formatda hazırlanmış “Soyuq günəş” filminin məhz Masallı rayonunda təqdim edilməsinin təqdirə layiq olduğunu bildirdi. Arzu Bağırovaya bu təşəbbüs üçün təşəkkür etdi, bundan sonrakı fəaliyyətində uğurlar arzu edərək birgə əməkdaşlığa hər zaman dəstəyimizi əsgirməyəcəyimizi bildirdi.

“Regional Hüquqi və İqtisadi Maarifləndirmə” İctimai Birliyinin sədri, layihənin ideya müəlliflərindən biri Arzu Bağırova bu layihəyə yerli səviyyədə hərtərəfli dəstək göstərən Masallı Rayon İcra Hakimiyyətinin rəhbərliyinə, layihənin həyata keçməsinə dəstək olan Qeyri-Hökumət Təşkilatlarına Dövlət Dəstəyi Agentliyinə xüsusi təşəkkürünü bildirdi. Qeyd etdi ki, Məhz bu diqqət və qayğı biz vətəndaş cəmiyyətinin nümayəndələrinə də ilham verir ki, öz fəaliyyətimizdə inklüzivlik mövzusuna daha çox yer verək, insanlara işıq tutaq.

Daha sonra millət vəkili İlham Məmmədov bildirdi ki, dövlətimizin başçısı Cənab Prezident İlham Əliyevin rəhbərliyi ilə ölkəmizdə bu sahəyə xüsusi diqqət yetirilir.Xüsusilə də Birinci vitse-prezident Mehriban xanım Əliyevanın təşəbbüsləri, qayğı və diqqəti nəticəsində son illərdə inklüziv təhsil, sosial rifah, əlilliyi olan şəxslərin cəmiyyətə inteqrasiyası istiqamətində çox mühüm addımlar atılıb.Mehriban xanımın rəhbərlik etdiyi Heydər Əliyev Fondunun bu sahədə həyata keçirdiyi layihələr bir daha göstərir ki, bərabərlik və mərhəmət cəmiyyətimizin əsas dəyərlərindəndir.
Sonra filmin prodüsseri Ramal Əzimzadə, prodüsser və ssenari müəllifi Sədaqət Kərimova görmə məhdudiyyətli insanların səs çoxluğu ilə bu filmin səsləndirilməsini istədiklərini qeyd etdilər.Layihə ləzgi xalqının ilk tammetrajlı bədii filmi hesab olunur. Filmdə ləzgi xalqının qədim adət-ənənələri və həyat tərzləri haqqında təsvirlər verildiyini diqqətə çatdırdılar.
Yekunda tədbir iştirakçıları “Zülməti dələn işıq” adlı layihə çərçivəsində hazırlanan “Soyuq Günəş” filmini izləndi. Film görmə məhdudiyyətli insanlar və eləcə də tamaşaçılar tərəfindən alqışlarla qarşılanıb.  

Tədbirdə iştirak edən görmə məhdudiyyətli insanlara və onların qəyyumlarına, həmçinin baxıcılarına (patronlar) “Regional Hüquqi və İqtisadi Maarifləndirmə” İctimai Birliyinin hədiyyələri təqdim edildi.









шаблоны для dle 11.2