Masallıda “Müdrik, fədakar və sədaqətli Azərbaycan qadını” adlı tədbir
07 mart 2025-ci il tarixdə Masallı rayon İcra Hakimiyyətinin inzibati binasında “8 Mart Beynəlxalq Qadınlar Günü” münasibətilə təşkil olunmuş “Müdrik, fədakar və sədaqətli Azərbaycan qadını” adlı tədbir keçirilmişdir.Tədbiri giriş sözü ilə açan Masallı rayon İcra Hakimiyyətinin Başçısı Araz Əhmədov qeyd etmişdir ki, ölkəmizdə dövlət qadın siyasətinin əsasını qoyan Ümummilli lider Heydər Əliyev qadın şəxsiyyətinə böyük hörmətlə yanaşırdı. Ulu öndər ölkə həyatının bütün sahələrində qadınlara xüsusi yer ayırırdı, onların hər tərəfli fəaliyyətinə geniş meydan verirdi, lider qadınlar yetişdirirdi. Onun dövlət qadın siyasəti haqqında tarixi qərarında məqsəd cəmiyyətdə qadınların rolunun artırılmasına, qadınlarla kişilər arasında bərabərliyin gerçəkləşdirilməsinə, qadınların ictimai-siyasi proseslərə cəlb edilməsinə, qadın problemlərinin həllinə nail olmaq idi. Ulu öndər qadınlar haqqında çox müdrik fikirlər söyləmişdir: “Cəmiyyətdə qadınların üzərinə daim çox böyük vəzifələr düşür, onların işi həmişə ağırdır. Ancaq onlar bu vəzifələri şərəflə yerinə yetirir və həmişə olduğu kimi indi də cəmiyyətdə aparıcı rol oynayırlar”.
Dövlət Qadın siyasətinin cənab Prezident İlham Əliyev tərəfindən qətiyyətlə davam etdirilməsi isə Azərbaycan qadınlarının məsuliyyətini daha da artırır. İndi qadın hüquqlarının təmin edilməsi sahəsində möhkəm hüquqi baza mövcuddur. Qadınların ictimai-siyasi həyatdakı fəallığı ilbəil artır.
Daha sonra rayon rəhbəri çıxışında bildirmişdir ki, respublikamızın hər yerində olduğu kimi rayonumuzda da qadın kadrların önə çəkilməsi, qadın siyasətinin dəstəklənməsi, həmçinin gender bərabərliyi məsələləri daim diqqət mərkəzində saxlanılır.
Belə ki, rayon əhalisinin 49.5%-ni qadınların təşkil etdiyi Masallı rayonunda qadın siyasətinin dəstəklənməsi hər sahədə hiss olunur. Bu gün rayonumuzda Dövlət qulluqçularının 12.6 % (215 nəfərin 27-si), Təhsil sahəsində çalışanların 63.2% (2468 nəfərin 1559-u), Səhiyyə sahəsində çalışanların 70% (855 nəfərin 598-i), və Mədəniyyət sahəsində çalışanların 67%-ni (315 nəfərin 211-i) qadınlar təşkil edir. Rayon üzrə qadın idmançılarımızın sayı isə 84 nəfərdir.
Qadınların önə çəkilməsi yerli özünüidarəetmə orqanlarında da hiss olunur. Belə ki, inzibati ərazi dairələri üzrə nümayəndəliklərində və bələdiyyələrdə çalışan qadınların sayında da ciddi artım müşahidə olunmaqdadır. Hazırda ərazi idarəetmədə çalışanların 28%-ni (153 nəfərin 43-ü), bələdiyyə orqanlarında çalışanların isə 39%-ni (232 nəfərin 90-ı) qadınlar təşkil edir.
Qadınlarımız həmçinin partiya sıralarında da fəal təmsil olunurlar və bu hal getdikcə artmaqdadır. Bu gün Yeni Azərbaycan Partiyasının Masallı rayon təşkilatının 10893 partiya üzvündən 3702 ( 34%) nəfərini qadınlar təşkil edir.
Tədbirdə çıxış edən fəal qadınlar ölkədə və rayonumuzda qadınlara daim diqqət və qayğının olduğunu qeyd edərək respublikaımızın bütün sahələrində qadınlara xüsusi önəm verildiyini qeyd edərək Azərbaycan Respublikasının Prezidenti Cənab İlham Əliyevə, Azərbaycan Respublikasının birinci Vitse-prezidenti Mehriban xanım Əliyevaya və rayon rəhbərliyinə minnətdarlıqlarını ifadə etdilər.
Sonda Masallı rayon İcra Hakimiyyətinin Başçısı Araz Əhmədov tərəfindən tədbir iştirakçılarına gül və hədiyyələr təqdim edilmişdir.
