Masallıda rayon rəhbəri qalib futbolçuları qəbul edib
03 iyun 2025-ci il tarixdə Masallı Rayon İcra Hakimiyyətinin başçısı Araz Əhmədov 2025-ci il 19-25 may tarixlərdə “Təhsil” Respublika İdman Mərkəzinin təşkilatçılığı ilə 2014-2015-ci il və daha kiçik təvəllüdlü idmançılar arasında keçirilən mini-futbol üzrə respublika birinciliyində birinci yerə layiq görülən Masallı Uşaq-Gənclər İdman-Şahmat Məktəbinin komandasının üzvləri, məktəbin direktoru və məşqçi-müəllim heyəti ilə görüşüb.
Rayon İcra Hakimiyyətinin başçısı qalib idmançıları, məktəb kollektivini, məşqçi-müəllim heyətini qələbə münasibəti ilə təbrik edib, onlara növbəti yarışlarda uğurlar arzulayıb, yeniyetmələrin nəzərinə idmanın sağlamlıq, sağlam həyat tərzi keçirtmək və pis vərdişlərdən uzaq olmaq üçün önəmini çatdırıb.
Baş məşqçi-müəllim, veteran futbolçu Rövşən Süleymanov yarış barədə məlumat verib, göstərilən dəstəyə görə rayon rəhbərinə təşəkkür edərək, idmançılar tərəfindən imzalanan futbol topunu və digər xatirə hədiyyələrini rayon rəhbərinə təqdim edib.
Yekunda qalib idmançılara kubok, medal və diplomları təqdim edilib.
