Masallıda "Aprel döyüşləri şəhidlərinin qəhrəmanlığının tərənnümü" adlı tədbir
Masalli rayon Heydər Əliyev Mərkəzində Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, Masallı Rayon İcra Hakimiyyəti və "Şəhid Analarına Dəstək" İctimai Birliyinin birgə təşkilatçılığı ilə “Konstitusiya və Suverenlik ili"nə həsr olunmuş "Aprel döyüşləri şəhidlərinin qəhrəmanlığının tərənnümü" adlı tədbir keçirildi.
Tədbir Azərbaycan Respublikasının Dövlət himninin səslənməsi ilə açıq elan edildi. Torpaqlarımızın azadlığı uğrunda canından keçən qəhrəman şəhidlərimizin əziz xatirəsi bir dəqiqəlik sükutla yad edildi və aprel döyüşləri şəhidlərinin əziz xatirəsinə həsr olunmuş "Zəfər yolu" adlı videoçarx nümayiş olundu.
Sonra «Şəhid Analarına Dəstək» İctimai Birliyinin sədri şəhid Əbdülməcid Axundovun anası Ceyran Həsənova, Aprel döyüşlərinin şəhidi Nurlar Əsgərlinin və Vətən müharibəsinin şəhidi, Vətən Müharibəsi Qəhrəmanı İntiqam Əsgərlinin anası Ziba Əsgərova, aprel döyüşlərinin şəhidi Müsfiq Orucovun anası Zəngilan rayon 7 saylı orta məktəbin direktoru Aygün Məmmədli çıxış edərək Azərbaycan Ordusunun hərb tarixinin şanlı səhifəsi olan Aprel zəfərinin 44 günlük Vətən müharibəsindəki parlaq qələbənin, torpaqlarımızın azad olunmasının və böyük qayıdış salnaməsinin başlanğıcı olduğunu bildirdilər.
Tədbirdə Masallı rayon Mədəniyyət Mərkəzinin musiqi kollektivinin ifasında lirik mahnılar ifa olundu.
Tədbirin sonunda çay süfrəsi ətrafında şəhid ailələ üzvləri ilə maraqlı müzakirələr aparıldı.
