Masallıda “Qərbi Azərbaycan İrsi” kitabının I cildinin təqdimat mərasimi
15 iyul 2025-ci il tarixdə Masallı şəhər Heydər Əliyev Mərkəzində “Qərbi Azərbaycan İrsi” kitabının I cildinin təqdimat mərasimi keçirilmişdir.
Tədbirdə Masallı Rayon İcra Hakimiyyətinin Başçısı Araz Əhmədov, Milli Məclisin Elm və təhsil komitəsinin sədri, Yeni Azərbaycan Partiyasının idarə heyətinin üzvü, Anar İsgəndərov, YAP Masallı rayon təşkilatının sədri Seyfəddin Əliyev, şəhid ailələri, idarə, müəssisə, təşkilat rəhbərləri, eləcə də rayonun ağsaqqalları, ziyalıları və media əməkdaşları iştirak etmişlər.
İlk öncə tədbir iştirakçıları Müstəqil Azərbaycan dövlətinin qurucusu və memarı, Azərbaycan xalqının Ümummilli Lideri Heydər Əlirza oğlu Əliyevin abidəsi qarşısına tər gül dəstələri düzərək dahi şəxsiyyətin əziz xatirəsini ehtiramla yad etdilər.
Təqdimat mərasimi Ulu Öndər Heydər Əliyevin, Azərbaycan Respublikasının suverenliyi və ərazi bütövlüyü uğrunda canlarından keçən şəhidlərimizin əziz xatirəsinin 1 dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başladı.
Tədbirin davamında azərbaycanlıların deportasiyasına həsr olunmuş “Qərbi Azərbaycan irsi” tədqiqatlar seriyasından sənədli videoçarx nümayiş edildi.
Sonra Masallı Rayon İcra Hakimiyyətinin başçısı Araz Əhmədov Qərbi Azərbaycana dair həqiqətlərin sistemli şəkildə araşdırılması və dünya ictimaiyyətinə çatdırılması istiqamətində müasir elmi yanaşmalara uyğun yeni fundamental araşdırma olan “Qərbi Azərbaycan İrsi” kitabının I cildi Qərbi Azərbaycana Qayıdış Konsepsiyasının hazırlanması ideyasının bir hissəsi, mahiyyət etibarı ilə bütün Azərbaycan xalqının iradəsinin ifadəsi olması, bu nəşrin təkcə tarixi ədalətin bərpasına deyil, həm də gələcək nəsillərin yaddaşında Qərbi Azərbaycanın zəngin irsini yaşatmağa xidmət etməsi, Azərbaycanın tarixi torpaqlarında ermənilərin xarici havadarlarının köməyi ilə yaratdıqları Ermənistan bu gün Avrasiya məkanında mövcud olan yeganə monoetnik dövlət olması, bu da tarixən həmin torpaqlarda yaşamış azərbaycanlıların öz dədə-baba yurdlarından zorla deportasiya olunmalarından sonra baş verməsi barədə çıxış etdi.
Daha sonra Millət vəkili Anar İsgəndərov Qərbi Azərbaycan tarixi ilə bağlı faktları diqqətə çatdıran geniş məruzə ilə çıxış etdi.
Təqdimat mərasimində çıxış edən YAP Masallı Rayon Təşkilatının sədri Seyfəddin Əliyev, “Masallı Ziyalıları” İctimai Birliyinin sədri Qardaş Fətullayev, Dəfinə məktəb liseyinin tarix müəllimi, tarix üzrə fəlsəfə doktoru Mürvət Abbasov bildirdi ki, müzəffər Ali Baş Komandan, möhtərəm Prezidentimiz cənab İlham Əliyevin rəhbərliyi ilə Vətən müharibəsində qazandığımız Zəfərdən sonra qarşımızda yeni perspektivlər açılb.
Qazandığımız zəfər işğaldan azad olunan ərazilərə məcburi köçkünlərimizin qayıdışını təmin etməklə yanaşı həm də soydaşlarımızın əzəli Qərbi Azərbaycan torpaqlarına qayıdışının da təməlini qoyub. Azərbaycan Vətən müharibəsində əldə etdiyi tarixi Qələbəsi ilə Cənubi Qafqazda yaratdığı reallıqların verdiyi imkanlardan yararlanmağın və tarixi ədalətin Qarabağ və Şərqi Zəngəzurda olduğu kimi, Qərbi Azərbaycan torpaqlarında da bərpa edilməsinə nail olmağın zamanıdır.
Ona görə buna nail olmaq üçün biz, o cümlədən beynəlxalq müstəvidə daha fəal olmalıyıq. “Qərbi Azərbaycan İrsi” kitabının I cildi həm milli-mədəni irsin qorunmasına, həm də beynəlxalq hüquq müstəvisində Azərbaycan həqiqətlərinin tanıdılmasına əhəmiyyətli töhfə verir.
“Qərbi Azərbaycan İrsi” kitabının I cildinin təqdimat mərasimi Azərbaycan Respublikasının Prezidenti Cənab İlham Əliyevin sözləri ilə: “Bu gün biz yaxşı bilirik ki, Ermənistan dövləti tarixi Azərbaycan torpaqlarında yaranıbdır.İrəvan xanlığı, Zəngəzur, Göyçə mahalı bizim tarixi torpağımızdır.Biz azərbaycanlılar o torpaqlara qayıtmalıyıq və qayıdacağıq!” yekunlaşmışdır.
